Ne tibi noxa recens, scelerum Deus ultor! Idumes
Excidat, et Solymis perniciosa dies:
Vertite, clamabant, fundo jam vertite templum,
Tectaque montanis jam habitanda feris.
Te quoque pœna manet, Babylon! quibus astra lacessis
Culmina mox fient, quod premis, æqua solo:
Felicem, qui clade pari data damna rependet,
Et feret ultrices in tua tecta faces!
Felicem, quisquis scopulis illidet acutis
Dulcia materno pignora rapta sinu!