Anansi call Horse a go bush cut plantain. When dey cut done, dey carry out in de open, dey begin to play stick, lick stick. Den Anansi said, “Brar Horse, we hungry now, we don’ have no fire fe roast plantain.” So say to Horse, “Go see fire quite yonder? Go deh, go tak fire come, mak we roast plantain!” Horse fling up him tail on back, gallop, gone. Meanwhile him gone, Anansi ’trike him tinder-box an buil’ a fire roast every plantain; eat all de plantain, leave only four. Horse gallop away an’ kyan’ ketch de fire an’ turn back. Anansi say, “Brar Horse, when you gone, one man pass heah gi’ me fire an’ me roast de plantain; as me roas’ee done, one man come beat me an’ tak away de plantain on’y lef’ dem four heah gi’ me!” So Brar Horse say, “Never min’! you tak two, me tak two.” So Horse takee.
Dat time Brar Goat go bush kneel down watch Brar Anansi, watch what take place; so de nex’ day, Goat say him will go wid Anansi. Dem two go, dem two cut plantain, an’ dem come out ’pon de open an’ dem play. So Anansi said, “Brar Goat, we hungry now an’ we ha’ no fire. See fire quite yonder? gallop go get fire an’ come.” Goat gallop, go roun’ clump of bush, go kneel down on knee go watch him. Him ’trike him tinder-box mak a fire, peel ev’ry plantain put a fire. When de plantain roast, he ’crape ev’ry bit. As him ’crapee, Goat get up a come. Goat cut ’tick an’ him jump one side so him put circle roun’ de fire-side, an’ say to Anansi, “Put you han’ in now, sah!” an’ jump de odder side an’ put circle again. So den Anansi begin to beg, an’ Goat tak away eberyt’ing didn’t gib him one!
Jack man dory! [[47]]
37. Anansi in Monkey Country. [[Note]]
a. Bunya.
Elizabeth Hilton, Harmony Hall, Cock-pit Country.
Anansi go to Monkey country. Put on a big pot of water an’ tell the Monkey when him get in the pot of water, when him say “Bunya”, they mus’ take him out of the pot of water. When they take him out, they mus’ go in. So when he go in the pot of water, as soon as he feel the water hot he say, “Bunya.” They take him out. An’ put all of them one time into the pot of water. An’ when them said, “Bunya!” Anansi said, “No bunya yet!” An’ said, “Bunya!” Anansi said, “No bunya yet!” Anansi wouldn’t take them out until them boil. Anansi take them out an’ eat them.
One little one lef’ at the top of the pot that the water didn’t scald. That one run go to the next Monkey country an’ tell them the story about Anansi an’ the ‘bunya.’ When Anansi eat, he start to the other country, an’ him go there an’ tell the Monkey mus’ put him into the pot of water an’ when he say, “Bunya,” mus’ take him out. So when Anansi feel the water hot, he say, “Bunya!” Monkey say, “No bunya yet!” Anansi say, “Bunya!” Monkey say, “No bunya yet!” Monkey keep Anansi in that pot till him kill him.