b. Christen Christen.
Adolphus Iron, Claremont, St. Ann.
One time hard time ketch Brar Nansi. Him couldn’t get not’ing to eat. Him trabble away to Monkey country fe go preach. When him ketch deh, him say, “Well, frien’s, I come here to chris’en, but I chris’en wid a large oben.” De Monkey, dem glad fe hear. Dem jump an’ buil’ up de oben. Anansi say, “You mus’ pack it wid wood an’ light it wid fire. When it well hot, me will go in first, an’ when you hear me say, ‘Chris’en,’ you mus’ open de door.” De Monkey, dem agree.
De oben buil’, de oben light, Anansi go in. Anansi holler, “Chris’en!” Dem open de door. Anansi jump out, dem begin jump in. When de las’ monkey jump in, Anansi shet de door. Monkey begin holler, “Chris’en! chris’en!” Anansi say, “No chris’en yet!” When Anansi t’ink dem a well roas’, him open de door. One scorch-side one jump out an’ run fe de odder Monkey country an’ tell all wha’ done.
Anansi stan’ deh till him eat off de whole ob de roas’ one dem. Him trabble again till him ketch de odder Monkey country. All was prepare to meet him. De scorch-sided one meet him first. [[48]]Anansi say, “Brar, I t’ink I know you!” De Monkey said, “No, sah, a de firs’ me an’ you buck up!” Anansi say, “Well, I come here to chris’en, but I chris’en wid an oben.” De Monkey, dem buil’ up de oben quicker yet. Anansi say, “I will go in firs’; when you hear I say, ‘Chris’n!’ you open de do’.” All de Monkey say yes. When Anansi feel de fire, him holler, “Chris’n, chris’n, chris’n!” De Monkey say, “No chris’n yet!” An’ dey let Anansi stay all roas’ till he burst!