Forahtun sie in tho gahun so sinan anasahun;
Joh hintarquamun harto thes Gotes boten uuorto.
Sprah ther Gotes boto sar. "Ih scal íú sagen uuuntar.
Ju scal sin fon Gote heil; nales forahta nihein.
Ih scal iu sagen imbot, gibot ther himilisgo Got;
Ouh nist ther er gihorti so fronisg arunti.
Thes uuirdit uuorolt sinu zi euuidon blidu,
Joh al giscaft thiu in uuorolti thesa erdun ist ouh dretenti
Niuuui boran habet thiz lant then himilisgon Heilant;
The ist Druhtin Krist guater fon iungeru muater.