La Tierce raison si est, que la terre de Prouuence dont ie suis ne et nourry est de present tellement atournee par le changement de noble seigneurie et pour les diversitez doppinions qui sont entre les nobles et le communes que a grant paine pourroit homme tant fust saige racompter les maulx que les gens du pays pour ce debat seuffrent.
La Quarte raison est, que ie considere plusieurs choses dictes de grans clerez modernees que bien pensent entendre les Prophecies anciennes parlans des maulx presens et dient que vng de la haulte lignee de France doit estre celluy par qui les remdes seront donnez au siecle trauailant, et mis en grande pestitance pour lesquelles raisons me suis efforce de faire aulcune chose nouuelle affin que vostre ieunesse soit informee de plusieurs entendemens de la saincte escripture et aussi affin que vostre personne soit plus adonnee de faire secours a la saincte foy de Iesu Crist et faire que les Prophecies qui sentendent de vostre digne personne et escriptures soyent verifiez par voz bonne œuures si vous supplie mon tres hault Seigneur que rien que ie die en ce liure ne vueillez mespriser car ce que iay mis en luy prent son fondement sus le droit canon et civil et sus naturelle philosophie, qui nest aultre chose que raison de nature et aura nom cestuy liure Larbre des Batailles pour fournir lequel liure me fault trouuer matiere condecente a ce faire, si mest venu en ymaginacion faire vng Arbre de Dueill, au dessus duquel pourrez veoir les regnes de Saincte Eglise en grandes et merueilleuses tribulations. Apres pourrez veoir la grande discention qui est auiourdhuy entre les Roys et Princes Crestiens. Pareillement pourrez veoir le grande discencion et murmure qui est entre les Nobles et les Communes. Et deuiseray mon Liure en quatre parties principalles ainsi comme a plain est cy apres declaire dont en la premiere partie sera faicte mention des tribulations de l'eglise jadis passees devant l'advenement de Jesu Christ nostre Sauveur. En la seconde partie sera traicte de la destruction des quatre grans royaulmes jadis. En la tierce partie sera traicte des batailles en general. En la quarte partie sera dit du battailles en special.
¶ QUELLES CHOSES APPARTIENNENT ESTRE FAICTES A TOUS BONS ROYS ET PRINCES.
CHAPITRE CLXXVI.
On disons aulcune chose des Roys pource que apres Lempereux ilz sont les plus honnorez sur tous les aultres Princes. Et encores ce nom cy de Roy selon la Saincte Escripture sembleroit estre de plus grande excellence que le nom de Lempereur, car nostre Seigneur se nomme et appelle en plusieurs lieux et endroitz de la saincte Escripture Roy des Roys et Seigneur de Seigneurs.
Item, le benoist filz de Dieu en aulcuns lieux de la Saincte Escripture est appele filz du Roy Dauid par humanite. Et ainsi par excellence de ce nom de Roy appellons nous de lignage royal. Et en oultre selon la doctrine et enseignement de Monseigneur, Sainct Paul Apostre qui preschoit au peuple en leur admonestant que pour lhonneur et reuerence de Dieu ilz fussent soubmys a toute creature humaine et en especial au Roy comme au plus noble et excellent de tous les aultres mesmement en approuuant la dignite de ce nom de Roy.
Et pour dire aulcun bon notable auquel ieunes Roys puissent prendre plaisir. Roy qui veult estre bon guerroyer sur saige fier et couraigeux, et de se gens il soit seigneur, comme de quaille espreuier, et soit misericors et rigoureux quant est besoing, et que au besoing soit le premier se darmes veult estre eureux. Pour retourner a nostre propos, &c.
Moult daultres belles et notables choses appartenans a tous bons Roys et Princes pourroye encores dire et assez trouuer. Mais pour le present ie ne pense plus riens a escripre en ce liure, car ien suis tout lasse. Toutesfoys le temps viendra se Dieu me donne espace de viure que ie escripray aulcunes choses sur les contenances de toutes personnes soyent ecclesiasticques ou seculiers, hommes ou femmes ce qui leur est necessaire dauoir au plus pres que ie pourray de la Saincte Escripture et du droict escript selon les dignites de leur offices. Et ie prie humblement et deuotement a nostre Seigneur, que par sa saincte grace vous doint en telle maniere gouuerner vostre Royaulme et la Saincte Couronne quil vous a commise que apres la fin il vous maine et conduyse a la saincte gloire de Paradis qui iamais ne fauldra. Amen.
¶ Cy fine le liure intitule Larbre des Batailles.
In the Preface to the edition printed by Anthony Verard, at Paris, on the 8th of June 1493, there are several variations; and the sentence in which the name of the Author occurs runs thus—"Mon tres hault et redoubte Seigneur souvent j'ay eu voulente de faire ce present livre," omitting the name altogether. The last Chapter of the work is numbered cxxxxii in Verard's edition, and ends in the same manner as the other.