And from that yle, men gon be see, from yle to yle, unto an yle, that is clept Tracoda; where the folk of that contree ben as bestes and unresonable, and duellen in caves, that thei maken in the erthe; for thei have no wytt to maken hem houses. And whan thei seen ony man passynge thorghe here contrees, thei hyden hem in here caves. And thei eten flesche of serpentes; and thei eten but litille, and thei speken nought; but thei hissen, as serpentes don. And thei sette no prys be no richesse, but only of a precyous ston, that is amonges hem, that is of 60 coloures. And for the name of the yle, thei clepen it Tracodon. And thei loven more that ston, than ony thing elle: and zit thei knowe not the vertue thereof: but thei coveyten it and loven it only for the beautee.
Aftre that yle, men gon be the see occean, be many yles, unto an yle, that is clept Nacumera; that is a gret yle and good and fayr: and it is in kompas aboute, more than a 1000 myle. And alle the men and wommen of that yle han houndes hedes: and thei ben clept Cynocephali: and thei ben fulle resonable and of gode undirstondynge, saf that thei worschipen an ox for here god. And also everyche of hem berethe an ox of gold or of sylver in his forhed, in tokene that thei loven wel here god. And thei gon alle naked, saf a litylle clout, that thei coveren with here knees and hire membres. Thei ben grete folk and wel fyghtynge; and thei han a gret targe, that coverethe alle the body, and a spere in here hond to fighte with. And zif thei taken ony man in bataylle, anon thei eten him. The kyng of that yle is fulle riche and fulle myghty, and righte devout aftre his lawe: and he hathe abouten his nekke 360 perles oryent, gode and grete, and knotted, as Pater Nostres here of amber. And in maner as wee seyn oure Pater Noster and oure Ave Maria, cowntyng the Pater Nosters, right so this kyng seythe every day devoutly 300 preyeres to his god, or that he ete: and he berethe also aboute his nekke a rubye oryent, noble and fyn, that is a fote of lengthe, and fyve fyngres large. And whan thei chesen here kyng, thei taken him that rubye, to beren in his hond, and so thei leden him rydynge alle abouten the cytee. And fro thens fromward, thei ben alle obeyssant to him. And that rubye he schalle bere alle wey aboute his nekke: for zif he hadde not that rubye upon him, men wolde not holden him for kyng. The grete Cane of Cathay hathe gretly coveted that rubye; but he myghte never han it, for werre ne for no maner of godes. This kyng is so rightfulle and of equytee in his doomes, that men may go sykerlyche thorghe out alle his contree, and bere with him what him list, that no man schalle ben hardy to robben hem: and zif he were, the kyng wolde iustifyed anon.
Fro this lond men gon to another yle, that is clept Silha: and it is welle a 800 myles aboute. In that lond is fulle mochelle waste; for it is fulle of serpentes, of dragouns and of cokadrilles; that no man dar duelle there. Theise cocodrilles ben serpentes, zalowe and rayed aboven, and han 4 feet and schorte thyes and grete nayles, as clees or talouns; and there ben somme that han 5 fadme in lengthe, and summe of 6 and of 8, and of 10: and whan thei gon be places, that ben gravelly, it semethe as thoughe men hadde drawen a gret tree thorghe the gravelly place. And there ben also many wylde bestes, and namelyche of olyfauntes. In that yle is a gret mountayne; and in mydd place of the mount, is a gret lake in a fulle faire pleyne, and there is a gret plentee of watre. And thei of the contree seyn, that Adam and Eve wepten upon that mount an 100 zeer, whan thei weren dryven out of Paradys. And that watre, thei seyn, is of here teres: for so moche watre thei wepten, that made the forseyde lake. And in the botme of that lake, men fynden many precious stones and grete perles. In that lake growen many reedes and grete cannes; and there with inne ben many cocodrilles and serpentes and grete watre leches. And the kyng of that contree, ones every zeer, zevethe leve to pore men to gon in to the lake, to gadre hem precyous stones and perles, be weye of alemesse, for the love of God, that made Adam. And alle the zeer, men fynde y nowe. And for the vermyn, that is with inne, thei anoynte here armes and here thyes and legges with an oynement, made of a thing that is clept lymons, that is a manere of fruyt, lyche smale pesen: and thanne have thei no drede of no cocodrilles, ne of non other venymous vermyn. This watre rennethe, flowynge and ebbynge, be a syde of the mountayne: and in that ryver men fynden precious stones and perles, gret plentee. And men of that yle seyn comounly, that the serpentes and the wilde bestes of that contree ne will not don non harm, ne touchen with evylle, no strange man, that entrethe into that contree, but only to men that ben born of the same contree. In that contree and othere there abouten, there ben wylde gees, that han 2 hedes: and there ben lyouns alle white, and als grete as oxen, and many other dyverse bestes, and foules also, that be not seyn amonges us. And witethe wel, that in that contree and in othere yles there abouten, the see is to highe, that it semethe as though it henge at the clowdes, and that it wolde covere alle the world: and that is gret mervaylle, that it myghte be so, saf only the wille of God, that the eyr susteynethe it. And therfore seyth David in the Psautere, Mirabiles elationes Maris.
How men knowen be the Ydole, zif the sike schalle dye or non. Of folk of dyverse schap and merveylously disfigured: And of the Monkes, that zeven hire releef to Babewynes, Apes and Marmesettes and to other Bestes.
[Sidenote: Cap. XIX.] From that yle, in goynge be see, toward the southe, is another gret yle, that is clept Dondun. In that yle ben folk of dyverse kyndes; so that the fadre etethe the sone, the sone the fadre, the husbonde the wif, and the wif the husbonde. And zif it so befall, that the fadre or modre or ony of here frendes ben seke, anon the son gothe to the prest of here law, and preyethe him to aske the ydole, zif his fadre or modre or frend schalle dye on that evylle or non. And than the prest and the sone gone to gydere before the ydole, and knelen fulle devoutly, and asken of the ydole here demande. And zif the devylle, that is with inne, answere, that he schalle lyve, thei kepen him wel: and zif he seye, that he schalle dye, then the prest gothe with the sonne, with the wif of him that is seeke, and thei putten here hondes upon his mouthe, and stoppon his brethe, and so thei sleen him. And aftre that, thei choppen alle the body in smale peces, and preyen alle his frendes to comen and eten of him, that is ded: and thei senden for alle the mynstralle of the contree, and maken a solempne feste. And whan thei han eten the flessche, thei taken the bones, and buryen hem, and syngen and maken gret melodye. And alle tho that ben of his kyn, or pretenden hem to ben his frendes, and thei come not to that feste, thei ben repreved for evere and schamed, and maken gret doel; for nevere aftre schulle thei ben holden as frendes. And thei seyn also, that men eten here flesche, for to delyveren hem out of peyne. For zif the wormes of the erthe eten hem, the soule scholde suffre gret peyne, as thei seyn; and namely, whan the flesche is tendre and megre, thanne seyn here frendes, that thei don gret synne, to leten hem have so long langure, to suffre so moche peyne, with oute resoun. And whan thei fynde the flessche fatte, than thei seyn, that it is wel don, to senden him sone to paradys; and that thei have not suffred him to longe, to endure in peyne. The kyng of this yle is a ful gret lord and a myghty; and hathe undre him 54 grete yles, that zeven tribute to him: and in everyche of theise yles, is a kyng crowned, and alle ben obeyssant to that kyng. And he hathe in tho yles many diverse folk. In one of theise yles ben folk of gret stature, as Geauntes; and thei ben hidouse for to loke upon; and thei han but on eye, and that is in the myddylle of the front; and thei eten no thing but raw flessche and raw fyssche.
And in another yle, toward the southe, duellen folk of foule suture and of cursed kynde, that han no hedes: and here eyen ben in here scholdres.
And in another yle ben folk, that han the face all platt, alle pleyn, with outen nese and with outen mouthe: but thei han 2 smale holes alle round, in stede of hire eyen: and hire mouthe is plait also, with outen lippes.
And in another yle ben folk of foul fasceon and schapp, that han the lippe above the mouthe so gret, that whan thei slepen in the sonne, thei keveren alle the face with that lippe.
And in another yle, ther ben litylle folk, as dwerghes; and thei ben to so meche as the pygmeyes, and thei han no mouthe, but in stede of hire mouthe, thei han a lytylle round hole: and whan thei schulle eten or drynken, thei taken thorghe a pipe or a penne or suche a thing, and sowken it in: for thei han no tonge; and therfore thei speke not, but thei maken a maner of hissynge, as a neddre doth, and thei maken signes on to another, as monkes don; be the whiche, every of hem undirstondethe other.
And in another yle ben folk, that han gret eres and longe, that hangen doun to here knees.