And in another yle ben folk, that han hors feet; and thei ben stronge and myghty and swift renneres; for thei taken wyld bestes with rennyng, and eten hem.
And in another yle ben folk, that gon upon hire hondes and hire feet, as bestes: and thei ben alle skynned and fedred, and thei wolde lepen als lightly in to trees, and fro tree to tree, as it were squyrelles or apes.
And in another yle ben folk that ben bothe man and womman: and thei han kynde of that on and of that other; and thei han but o pappe on the o syde, and on that other non: and thei han membres of generacioun of man and womman; and thei usen bothe, whan hem list, ones that on, and another tyme that other: and thei geten children, whan thei usen the membre of man; and thei bere children, whan thei usen the membre of womman.
And in another yle ben folk, that gon alle weyes upon here knees, ful merveylously; and at every pas that thei gon, it semethe that thei wolde falle: and thei han in every foot, 8 toes.
Many other dyverse folk of dyverse nature ben there in other yles abouten, of the whiche it were to longe to telle: and therfore I passe over schortly.
From theise yles, in passynge be the see occean toward the est, be many iourneyes, men fynden a gret contree and a gret kyngdom, that men clepen Mancy: and that is in Ynde the more: and it is the beste lond, and on of the fairest, that may be in alle the world, and the most delectable, and the most plentifous of all godes, that is in power of man. In that lond duellen many Cristene men and Sarrazynes: for it is a gode contree and a gret. And there ben there inne mo than 2000 grete cytees and riche, with outen other grete townes. And there is more plentee of peple there, than in ony other partie of Ynde; for the bountee of the contree. In that contree is no nedy man, ne none that gothe on beggynge. And thei ben fulle faire folk: but thei ben all pale. And the men han thynne berdes and fewe heres; but thei ben longe: but unethe hathe ony man passynge 50 heres in his berd; and on heer sitt here, another there, as the berd of a lyberd or of a catt. In that lond ben many fairere wommen, than in ony other contree bezonde the see: and therfore men clepen that lond Albanye; because that the folk ben whyte. And the chief cytee of that contree is clept Latoryn; and it is a iourneye from the see: and it is moche more than Parys. In that cytee is a gret ryvere, berynge schippes, that gon to alle the costes in the see. No cytee of the world is so wel stored of schippes, as is that. And alle tho of the cytee and of the contree worschipen ydoles. In that contree ben double sithes more briddes than ben here. There ben white gees, rede aboute the nekke, and thei han a gret crest, as a cokkes comb upon hire hedes: and thei ben meche more there, than thei ben here; and men byen hem there alle quykke, right gret chepe. And there is gret plentee of neddres, of whom men maken grete festes, and eten hem at grete sollempnytees. And he that makethe there a feste, be it nevere so costifous, and he have no neddres, he hathe no thanke for his travaylle.
Many gode cytees there ben in that contree, and men han gret plentee and gret chep of alle wynes and vitailles. In that contree ben manye chirches of religious men, and of here lawe: and in tho chirches been ydoles, als grete as geauntes. And to theise ydoles thei zeven to ete, at grete festyfulle dayes, in this manere. Thei bryngen before hem mete alle soden, als hoot as thei comen fro the fuyr, and thei leten the smoke gon up towardes the ydoles; and than thei seyn, that the ydoles han eten; and than the religious men eten the mete aftrewardes. In that contree been white hennes withouten fetheres: but thei beren white wolle, as scheep don here. In that contree, wommen that ben unmaryed, thei han tokenes on hire hedes, lyche coronales, to ben knowen for unmaryed. Also in that contree, ther ben bestes, taughte of men to gon in to watres, in to ryveres and in to depe stankes, for to take fysche; the whiche best is but lytille, and men clepen hem loyres. And whan men casten hem in to the watre, anon thei bringen up gret fissches, als manye as men wold. And zif men wil have mo, thei cast hem in azen, and thei bryngen up als many as men list to have.
And fro that cytee, passynge many iourneyes, is another cytee, on of the grettest of the world, that men clepen Cassay; that is to seyne, the Cytee of Hevene. That cytee is well a 50 myle aboute, and it is strongliche enhabyted with peple, in so moche that in on house men maken 10 housholdes. In that cytee ben 12 princypalle zates; and before every zate, a 3 myle or a 4 myle in lengthe, is a gret toun, or a gret cytee. That cytee sytt upon a gret lake on the see; as dothe Venyse. And in that cytee ben mo than 12000 brigges: and upon every brigge, ben stronge toures and gode; in the whiche duellen the wardeynes, for to kepen the cytee fro the gret Cane. And on that o part of the cytee, rennethe a gret ryvere alle along the cytee. And there duellen Cristene men, and many marchauntes and other folk of dyverse natyouns: be cause that the lond is so gode and so plentifous. And there growethe fulle gode wyn, that men clepen Bigon, that is fulle myghty and gentylle in drynkynge. This is a cytee ryalle, where the Kyng of Mancy was wont to duelle: and there duellen many religious men, as it were of the order of freres: for thei ben mendyfauntes.
From that cytee, men gon be watre, solacynge and disportynge hem, tille thei come to an abbey of monkes, that is faste bye, that ben gode religious men, after here feythe and lawe. In that abbeye is a gret gardyn and a fair, where ben many trees of dyverse manere of frutes: and in this gardyn, is a lytille hille, fulle of delectable trees. In that hille and in that gardyn, ben many dyverse bestes, as of apes, marmozettes, babewynes, and many other dyverse bestes. And every day, whan the covent of this abbeye hathe eten, the awmener let bere the releef to the gardyn, and he smytethe on the gardyn zate with a clyket of sylver, that he holdethe in his hond, and anon alle the bestes of the hille and of dyverse places of the gardyn, comen out, a 3000 or a 4000; and thei comen in gyse of pore men: and men zeven hem the releef, in faire vesselles of sylver, clene over gylt. And whan thei han eten, the monk smytethe eft sones on the gardyn zate with the clyket; and than anon alle the bestes retornen azen to here places, that thei come fro. And thei seyn, that theise bestes ben soules of worthi men, that resemblen in lyknesse of the bestes, that ben faire: and therfore thei zeve hem mete, for the love of God. And the other bestes that ben foule, they seyn, ben soules of pore men and of rude comouns. And thus thei beleeven, and no man may putte hem out of this opynyoun. Theise bestes aboveseyd, thei let taken, whan thei ben zonge, and norisschen hem so with almesse; als manye, as thei may fynde. And I asked hem, zif it had not ben better, to have zoven that releef to pore men, rathere than to the bestes. And thei answerde me and seyde, that thei hadde no pore men amonges hem, in that contree: and thoughe it had ben so, that pore men had ben among hem, zit were it gretter almesse, to zeven it to tho soules, that don there here penance. Many other marveylles ben in that cytee and in the contree there aboute, that were to long to telle zou.
Fro that cytee, go men be the contree a 6 iourneyes, to another cytee, that men clepen Chilenfo: of the whiche cytee, the walles ben 20 myle aboute. In that cytee ben 60 brigges of ston, so faire, that no man may see fairere. In that cytee was the firste sege of the Kyng of Mancy: for it is a faire cytee, and plenteeyous of alle godes.