An’ how ye gat him i’ your thrall,
An’ brak him out o’ house an’ hall,
While scabs an’ botches did him gall,
Wi’ bitter claw,
An’ lows’d his ill tongu’d, wicked scawl,
Was warst ava?
But a’ your doings to rehearse,
Your wily snares an’ fechtin fierce,
Sin’ that day Michael did you pierce,
Down to this time,
Wad ding a’ Lallan tongue, or Erse,
In prose or rhyme.
An’ now, auld Cloots, I ken ye’re thinkin,
A certain Bardie’s rantin, drinkin,
Some luckless hour will send him linkin
To your black pit;
But, faith! he’ll turn a corner jinkin,
An’ cheat you yet.
But fare ye well, auld Nickie-ben!
O wad ye tak a thought an’ men’!
Ye aiblins might—I dinna ken—
Still hae a stake—
I’m wae to think upo’ yon den
Ev’n for your sake!
“AULD MARE MAGGIE.”