Monseigneur,

J’ay receu les lettres qu’il vous a pleu m’escrire ensemble entendu vostre response, et charge de Mr. le Trésorier Palamédes, laquelle, selon sa très bonne manière de faire, et au très grand contentement du Roy, mon maistre, il a sceu trèsbien dire et déclarer, et pourtant que par la response qu’il emporte, vous pourrez clairement cognoistre la bonne constance et continuation d’amitié et vnion, en quoy le Roy mon dit maistre entend persister à tout iamais tant luy que sa postérité, sans aucunement varier, ains faire tout ce que avec son honneur et condescentement luy sera possible, au desir du Roy, son bon frère: pourtant aussy, que le dict Trésorier vous sçaura faire ample rapport de toutes choses;

Monseigneur, après vous avoir très affectueusement prié que veuilliés persuader, et si mestier est, inculquer à la maté du Roy Ve Maistre, la grandeur de leur amitié, et bonne intention de la dicte response et qu’il ne veuille presser ne desyrer le Roy de chose pourquoy l’on pense avoir suspicion ou coniecture qu’en l’amitié d’entr’eux y entre aucun respect de lucre ou proffit particulier: car ce n’est pas assez, comme vous sçavez trop mieux, que leur amitié soit cogneue et prinse pour ferme et establie par entr’eux et leurs amys, qui est à leur grand confort et encouragement: Mais aussy est très expédient de l’entretenir et conduire en sorte que leurs Ennemis et malveillans n’ayant cause d’y pouvoir penser, ne suspecter aucune interruption, qui sera à leur très grand esbahissement Confusion et desconfort: et ce faisant, comme bien gist en vous, le bien et plaisir, qui à tout le monde en adviendra, ne se sçavoir assez estimer, sans vous rescrire pour le présent plus au long, m’estre de très bon cœur recommandé à Ve Seigneurie et offert tout ce en quoi vous sçauray faire honneur et plaisir Je supplie nostre benoist Créateur, que, à vous Monseigneur, il veuille donner sa saincte et digne garde.

Signé, Vostre à commandement

Thomas Cramwell.

Escript à Londres,
le iv iour de May[833].
1534.

Add. A Monseigneur

Monseigneur l’Admiral de France.

99. Cromwell to Lord Lisle.

R.O. Cal. viii. 419. Mar. 21 ‹1535›.