"Then, waur than a', there's the awesome nichts whan the ghaists and warlocks are aboot. I canna bide the nicht ava. God's daylicht is guid eneuch for Birsay, an' as lang as the sun shines, there's nae fear o' deil or witch-wife gettin' haud o' the puir cobbler chiel! But when the gloamin' cuddles doon intil the lap o' the nicht, and the corp-cannles lowe i' the bogs, an' ye hear the deils lauchin' and chunnerin' to themselves in a' the busses at the road-sides, I declare every stound o' manhood flees awa' clean oot o' Birsay's heart, an' he wad like to dee but for thocht o' the After come. An' deed, in the mirk-eerie midnicht, whether he's fearder to dee or to leeve, puir Birsay disna ken!"
"But, Birsay," I said, "ill-doers are aye ill-dreaders. Gin ye were to drap a' this thievery an' clash-carryin' wark, ye wadna be feared o' man or deil!"
"Weel do I ken," Birsay said, "that siccan ploys are no for the like o' me; but man, ye see, like ither folk, I'm terrible fond o' the siller. An' there's nocht so comfortin', when a' thae things are yammerin' to get haud o' ye, as the thocht that ye hae a weel-filled stockin'-fit whaur nane but yersel' can get haud o't!"
And the creature writhed himself in glee and slapped his thigh.
"Yae stockin' fu', man," he said, "an' tied wi' a string, an' the ither begun, an' as far up as the instep. O man, it's blythe to think on!
"But heard ye o' the whummel I gat aff this verra Duchrae kitchen laft?" said Birsay. He often came over in the gloaming on a news-gathering expedition. For it was a pleasure to give him news of a kind; and my cousin, who had not a great many occupations since Kate McGhie had gone back to the great House of Balmaghie, took a special delight in making up stories of so ridiculous a nature that Birsay, retailing them at headquarters, would without doubt soon find his credit gone.
"The way o't was this," Birsay continued. "As I telled ye, I gan frae hoose to hoose in the exercise o' my trade, for there's no sic a suitor i' the country-side as Birsay, though he says it himsel', an' no siccan water-ticht shoon as his ever gaed on the fit o' man. Weel, it was ae nicht last winter, i' the short days, Birsay was to begin wark at the Duchrae at sax by the clock on Monday morn. An' whan it comes to coontin' hours wi' Auld Anton Lennox o' the Duchrae, ye maun begin or the clock has dune the strikin'. Faith an' a' the Lennoxes are the same, they'll haud the nose o' ye to the grund-stane—an' the weemen o' them are every hair as bad as the men. There's auld Lucky Lennox o' Lennox Plunton—what said ye?—aweel, I'll gang on wi' my story gin ye like, but what's a' the steer so sudden, the nicht's afore us?
"As I was sayin', I had to start at Auld Anton's on the Monday mornin', gey an' early. So I thocht I wad do my travellin' in time o' day, an' get to the Duchrae afore the gloamin'. An' in that way I wad get the better o' the bogles, the deils o' the bogs, the black horse o' the Hollan Lane, an' a' sic uncanny cattle.
"But I minded that the auld tod, Anton Lennox, was a terrible man for examinin' in the Carritches, an' aye speer-speerin' at ye what is the Reason Annexed to some perfectly unreasonable command—an' that kind o' talk disna suit Birsay ava. So what did I do but started ower in the afternoon, an' gat there juist aboot the time when the kye are milkit, an' a' the folk eyther at the byre or in the stable.
"So I watched my chance frae the end o' the hoose, an' when no a leevin' soul was to be seen, I slippit up the stairs, speelin' on the rungs o' the ladder wi' my stockin' soles as quiet as pussy.