"Then whan I got to the middle o' the laft, whaur the big hole o' the lum is, wi' the reek hingin' thick afore it gangs oot at the riggin' o' the hoose, I keekit doon. An' there at the table, wi' his elbows on the wood, sat Auld Anton takin' his lesson oot o' the big Bible—like the bauld auld Whig that he is, his whinger in a leather tashe swingin' ahint him. It's a queerie thing that for a' sae often as I hae telled the curate aboot him, he has never steered him. There maun be something no very thorough aboot the curate, an' he none so great a hero wi' the pint stoup either, man!
"Aweel, as the forenicht slippit on, an' the lassies cam' in frae the byre, an' the lads frae the stable, it was just as I expected. They drew up their stools aboot the hearth, got oot their Bibles an' warmed their taes. Lord preserve me, to see them sittin' sae croose an' canty ower Effectual Callin' an' Reason Annexed, as gin they had been crackin' an' singin' in a change-hoose! They're a queer fowk thae Whigs. It wad hae scunnered a soo! An' twa-three neebours cam' in by to get the benefit o' the exerceeses! Faith! if Clavers had chanced to come by the road, he wad hae landed a right bonny flaucht o' them, for there wasna yin o' the rive but had grippit sword at either o' the twa risin's. For a' the auld carles had been at Pentland an' a' the young plants o' grace had been at Bothwell—ay, an' Auld Anton an' twa-three mair warriors had been at them baith. An' gin there had been a third he wad hae been there too, for he's a grim auld carle, baith gash an' steeve, wi' his Bible an' his brass-muntit pistols an' his Effectual Callin'!
"Then bywhiles, atween the spells o' the questions, some o' the young yins fell a-talkin', for even Auld Anton canna haud the tongues o' the young birkies. An' amang ither things what did the loons do but start to lay their ill-scrapit tongues on me, an' begood to misca' puir Birsay for a' that was ill!"
"'Listeners hear nae guid o' themselves,' is an auld-farrant say, Birsay," I said.
"Aweel," the suitor went on, "that's as may be. At ony rate, it was 'Birsay this' an' 'Birsay that,' till every porridge-fed speldron an' ill-gabbit mim-moo'ed hizzie had a lick at puir Birsay.
"But at the lang an' last the auld man catched them at it, an' he was juist the man to let them hear aboot it on the deafest side o' their heids. He was aye a don at reprovin', was Auld Anton. No mony o' the preachers could haud a can'le to him on the job.
"Is it no a gey queer thing," said Birsay, breaking off his story, "that when we set to an' curse a' an' sundry, they ca' it profane sweerin', and misca' us for awesome sinners; but when they lay their tongues to their enemies an' curse them, it's ca'ed a Testimony an' printed in a buik?"
The thing did indeed strike me as strange, but I desired to keep Birsay to his story, so I only said:
"But, Birsay, what did the auld man say to them when he heard them misca'in' you?"
"Oh, he e'en telled them that it wad fit them better to look to their ain life an' conversation. An' that it wad be tellin' them yae day, gin they had made as guid a job o' their life wark as Birsay made o' his bits o' shoon—a maist sensible an' just observe! Faith, the auld tog is nane sae ill an auld carle, though siccan a dour an' maisterfu' Whig. He kens guid leather wark when he sees it!