Of vnprofytable stody.
He that vayne stody doth haunt or exercyse
And lesyth his tyme, of fruyte voyde and barayne
Resortynge to ryot whiche cunnynge doth dispyse
And that of doctryne (in maner) hath disdayne
Suche shall in age of his madnes complayne
And seynge that he lesyth his tyme thus in foly
Let hym come to our folysshe company.
Nowe in this Nauy many them selfe present
Of this our roylame and from beyond the see
Whiche in theyr stody or lewde and neglygent
Lesynge theyr tyme at the vnyuersyte
Yet count they them selfe of great auctoryte
With theyr proude hodes on theyr neckes hangynge
They haue the lawde: but other haue the cunnynge