Anno MDCXI. die XIX. mensis Decembris. Sa Ra Mtas Daniæ, Norwegiæ & Dominus noster clementissimus, nobis infra nominatis, clementissime injunxit, ut Scotum quendam, Andream Ramsö, qui una cum duobus Locumtenentibus, totidemqe famulis, navi ex Suecia Lubecam tendens, in itinere unà cum navi captus atqe Hafniam conductus fuerat, posteà verò huc, uno Vicetenente comite, se receperat, de subsequentibus capitibus, propriâ Sæ Ræ Mtis manu designatis, interrogaremus, et quemlibet separatim examini submitteremus.
1. Ubi locorum familiaritatem primò colere ceperint, quo hospitio et hospite usi sint.
2. Quomodo commeatum vel abeundi facultatem obtinuerit.
3. Quot peregrini militum præfecti adhuc in Suecia, et quinam eorum ad conscribendum militem extra regnum, degant.
4. Quorum conterraneorum, et ad quos literas secum ferant. Nullum enim dubium, quin tam Stuardus, quàm alii ad suos amicos, literas dederint.
5. Quidnam Stuardus cum literis salvi conductus, Calmariæ a Nobis acceptis, egerit.
6. Causam dicat, cur Stuardus ab omnibus Suecis, Regis magnæ Britanniæ, appelletur legatus.
7. Quasnam conditiones obtulerint Stuardo, ipsius ære se liberandi.
Vicetenens speciatim interrogandus, quomodo à Capitaneo suo discesserit, et sub quo summo Duce stipendia fecerit.
Cùm vero meridianâ sit luce clarius, ejusmodi viris, qui diu in Suecia militarem operam præstiterunt, sine specialioribus passagii literis, abitum minime concedi, quo pacto inde solverit.