¶ The estate of a mayster of the chauncery, and other worshypfull prechours of pardon, and clerkes that ben gradewable / & all other ordres of
chastyte, persones & preestes, worshypfull marchauntes & gentylmen, all this may syt at the squyers table.
¶ An archebysshop and a duke may not kepe the hall, but eche estate by them selfe in chaumbre or in pauylyon, that neyther se other.
¶ Bysshoppes, Marques, Erles, & Vycountes, all these may syt two at a messe.
¶ A baron, & the mayre of London, & thre chefe Iuges, and the speker of the parlyament, & an abbot with a myter, all these may svttwo or thre at a messe
¶ And all other estates may syt thre or foure at a messe
¶ Also the Marshall muste vnderstande and knowe the blode royall, for some lorde is of blode royall & of small lyuelode. And some knyght is wedded to a lady of royal blode; she shal kepe the estate that she was before. And a lady of lower degree shal kepe the estate of her lordes blode / for that has the reverence. & therfore the royall blode shall haue the reuerence, as I haue shewed you here before.
¶ Also a marshall muste take hede of the byrthe, and nexte of the lyne, of the blode royall.
¶ Also he must take hede of the kynges offycers, of the Chaunceler, Stewarde, Chamberlayne, Tresourer, and Controller.
¶ Also the marshall must take heed vnto straungers, & put them to worshyp & reuerence; for and they haue good chere it is your soueraynes honour.