And where-so-euere þou be to digne or to suppe,
Of gentilnes take salt with þi knyf,
And be weel waar þou blowe not in þe cuppe.
Reuerence þi felawis; bigynne with hem no strijf;
To þi power kepe pees al þi lijf.
Intrippe no man where so þat þou wende,
No man in his tale, til he haue maade an eende.
¶ With þi fyngris marke not þi tale;
be weel avysid, & nameli in tendir age,
To drinke mesurabli boþe wiyn & ale.