To hunt in holteȝ & heþe, at hyndeȝ barayne,
Such a sowme he þer slowe bi þat þe sunne heldet,
Of dos & of oþer dere, to deme were wonder.
Þenne fersly þay flokked in folk at þe laste,
& quykly of þe quelled dere a querré þay maked;
Þe best boȝed þerto, with burneȝ in-noghe,
Gedered þe grattest of gres þat þer were,
& didden hem derely vndo, as þe dede askeȝ;
Serched hem at þe asay, summe þat þer were,
Two fyngeres þay fonde of þe fowlest of alle;