And hyr sone bare the nayles to themperour / And the emperour dyd do sette them in hys brydel and in hys helme whan he wente to batayle/. This referreth Eusebe whiche was bysshop of Cezayr24/ how be it that other say otherwyse/. Now it happed that Iulyan the appostate dyd doo25 slee quyriache that was bysshop of Iherusalem / by cause he had founde the crosse / for he hated hit soo mooche / that where somever he founde the crosse / he dyd hit to be destroyed / For whan he wente in batayle ageynste them of perse / he sente and commaunded quyriache to make sacrefyse to thydolles / and whan he wold not doo hit / he dyd do smyte of his right honde / and sayd wyth this honde hast thou wryten many letters / by whyche thou repellyd moche folke fro doynge sacrefyse to our goddes/.
26Mad dog.
27Since.
28Turn this evil
Quyriache sayd thou wood hounde26 thou hist doon to me grete prouffyte / For thou hast cut of the hande / wyth whiche I have many tymes wreton to the synagoges that they shold not byleve in Ihesu criste / and now sythe27 I am cristen / thou hast taken from me that whiche noyed me / thenne dyd Iulyan do melte leed, and caste it in his mowthe / and after dyd doo brynge a bedde of yron / and made quyriache to be layed and stratched theron / and after leyed under brennyng cooles / and threwe therein grece and salte / for to torment hym the more / and whan quyriache moved not / Iulyan themperour said to hym / outher thou shalt sacrefyse (to) our goddes / or thou shalt say at the leste thou art not cristen/. And whan he sawe he wolde not do never neyther / he dyd doo make a depe pytte ful of serpentes and venemous bestys / and caste hym therein / & whan he entred / anone the serpentes were al deed/. Thenne Iulyan put hym in a cawdron ful of boylyng oyle / and whan he shold entre in to hit / he blessyd it & sayd / Fayre lord torne thys bane28 to baptysm of marterdom / Thenne was Iulyan moche angry / and commaunded that he should be ryven thorough his herte with a swerde / and in this manere he fynysshed his lyff.
The vertue of the crosse is declared to us by many miracles / For it happed on a tyme that one enchantour had dysceyved a notarye / and brought hym to a place / where he had assembled a grete companye of devylles / and promysed to hym to have muche rychesse / and whan he came there / he saw one persone blacke syttynge on a grete chayer / And all aboute hym al ful of horyble people and blacke whiche had speres and swerdes / Thenne demaunded thys grete devyll of the enchantour / who was that clerke / thenchantour sayd to hym / Syr he is oures / thenne sayd the devyl to hym yf thou wylte worshyp me and be my servaunte / and denye Ihesu cryste / thou shalt sytte on my right syde / The clerke anone blessyd hym wyth the sygne of the crosse / and sayd that he was the servaunte of Ihesu criste / his savyour / And anone as he had made the crosse / that grete multitude of devylles vanysshed aweye. It happed that this notarye after this on a tyme entryd with hys lord in the chyrche of saynt sophye / & knelyd doun on his knees to fore the ymage of the crucyfyxe / the which crucifyxe as it semed loked moche openly and sharpelye on hym/. Thenne his lord made hym to go aparte on another syde / and alleweye the crucifixe torned his eyen toward hym/. Thenne he made hym goo on the lefte syde / and yet the crucifixe loked on hym / Thenne was the lord moche admerveyled / and charged hym & commaunded hym that he shold telle hym wherof he had so deserved that the crucifyxe so behelde and loked on hym / Thenne sayde the notarye that he coude not remembre hym of no good thynge that he had doon / saufe that one tyme he wold not renye nor forsake the crucifixe tofore the devyl/.
Thenne late us so blesse us with the sygne of the blessyd crosse that we may therby be kepte fro the power of our ghoostly and dedely enemye the devyl / and by the glorious passyon that our saveour Ihesu cryst suffred on the crosse after this lyf we may come to his everlastyng blysse amen/.
Thus endeth thynvencion of the holy crosse.
