MAGGIE LAUDER.[21]
The cantie Spring scarce rear'd her head,
And Winter yet did blaud her,
When the Ranter came to Anster fair,
And speir'd for Maggie Lauder;
A snug wee house in the East Green,[22]
Its shelter kindly lent her;
Wi' canty ingle, clean hearth-stane,
Meg welcomed Rob the Ranter!
Then Rob made bonnie Meg his bride,
And to the kirk they ranted;
He play'd the auld "East Nook o' Fife;"
And merry Maggie vaunted,
That Hab himsel' ne'er play'd a spring,
Nor blew sae weel his chanter,
For he made Anster town to ring—
And wha 's like Rob the Ranter?
For a' the talk and loud reports,
That ever gaed against her,
Meg proves a true and carefu' wife,
As ever was in Anster;
And since the marriage-knot was tied,
Rob swears he coudna want her;
For he loves Maggie as his life,
And Meg loves Rob the Ranter.
CHARLIE IS MY DARLING.
O Charlie is my darling,
My darling, my darling;
O Charlie is my darling,
The young Chevalier!
When first his standard caught the eye,
His pibroch met the ear,
Our hearts were light, our hopes were high
For the young Chevalier.
O Charlie is my darling, &c.
The plaided chiefs cam frae afar,
Nae doubts their bosoms steir;
They nobly drew the sword for war
And the young Chevalier!
O Charlie is my darling, &c.