But he wha trusts to fortune's smile
Has meikle cause to fear;
She blinket blithe but to beguile
The young Chevalier!
O Charlie is my darling, &c.
O dark Culloden—fatal field!
Fell source o' mony a tear;
There Albyn tint her sword and shield,
And the young Chevalier!
O Charlie is my darling, &c.
Now Scotland's "flowers are wede away;"
Her forest trees are sere;
Her Royal Oak is gane for aye,
The young Chevalier!
O Charlie is my darling,
My darling, my darling;
O Charlie is my darling,
The young Chevalier.
THE BLACK-E'ED LASSIE.[23]
Air—"My only Jo and Dearie O!"
Wi' heart sincere I love thee, Bell,
But dinna ye be saucy, O!
Or a' my love I winna tell
To thee, my black-e'ed lassie, O!
It 's no thy cheek o' rosy hue,
It 's no thy little cherrie mou';
Its a' because thy heart 's sae true,
My bonnie black-e'ed lassie, O!
It 's no the witch-glance o' thy e'e,
Though few for that surpass ye, O!
That maks ye aye sae dear to me,
My bonnie black-e'ed lassie, O!
It 's no the whiteness o' thy skin,
It 's no love's dimple on thy chin;
Its a' thy modest worth within,
My bonnie black-e'ed lassie, O!
Ye smile sae sweet, ye look sae kind,
That a' wish to caress ye, O!
But O! how I admire thy mind,
My bonnie black-e'ed lassie, O!
I 've seen thine e'en like crystal clear,
Shine dimly through soft pity's tear;
These are the charms that mak thee dear,
To me, my black-e'ed lassie, O!