Item, I will and ordeyne that in every town in which I or ony to myn use have lordshepys, manerez, londes, and tenementes that the pore pepyl of the tenure of the seyd town have ij. yeer to gethyr in reward after theyre afferaunt and quantite of the x. part of oon yeerly valewe and reveneuse of the seyd [lor]dshepis, manerez, londes, tenementes, and rentes, halfe to be departyd to . . [par]ishe cherchis for werkys, ornamentes, and othyr thynges necessarye to the seyd chyrchis, and half to be departyd amonges the seyd pore pepil that be tenauntes[152.3] of the seid lordshepis, maneres, londes, and tenementes soo to be disposed aftyr the discrecion of myn executores [before namyd],[152.4] aftyr my will approvid, and my dettes payd.
Item, I will and ordeyne that the pryour of the prioury of the parishe cherch of Jernemuth for the tyme beynge, and hese covent and hise successorys, observe and kepe yeerly and perpetualy to endure an annversary in the seyd parishe cherche for to preye for the soule of my fadyr, John Fastolf, Squyer, that lythe buryed there in the seyd chyrche, with placebo and derige and messe, be note the vigyl and day of hese obit, with the noumbre of prystes and clerkes accordyng in such a cause; and for to susteyne the kepyng of the seyd annversary, I will that be the avise of myn executorys [before namyd][152.4] that londes or teneme[ntes] . . . . . . . . . . ordeynid to the yeerly valewe of xxs., and that to be inmorteis . . . . . . . . swyr to the seyd prioury or parishe chyrche, oonly to susteyne and bere . . . . . and chargys of the perpetuall kepyng and susteyning of the seyd annversary.
Item, I will and ordeyne that if I have ony reliquis of Seyntes, also suche ornamentes for the chirche, that I have left as vestmentes, garlementes of sylke or velwet, of robis, and my gownys, that parcell of hem be yovin to the seyd monastery cherche of Seynt Benettes, where I shal be buryed, to remayne for ornament of the chapell there be me late edified; and also part of hem to be distrubited amonges the parishe chyrchis that be in suche townes that I have ony lordshipis, manerez, londes, tenementes, and rentes, provided that a resonable and a competent part of the seyd reliquis and ornamentes be kept and govyn to the seyd collage to be made at Castre, and this to be doon be the avise of myn executores be fore namyd.[153.1]
Item, I will and ordeyne that suche of my consanguinite and kynred whyche be pore and have but litil substaunce to leve by, that they be relevyd of my goodes . . . . . havyng consederation to thoo that be nerrest of my kyn and of . . . . . Also of here good disposecion too God ward and to me in here . . . . . othir of my kyn, that a consyderacion be hadde and yovyn to the relyf and prefer[ment] of my cosyn Robert Fitzraf, for hese good, trewe and long servise to me doon and contynwyd, and alsoo be reson of my consanguynite and kynred.
Item, I will and ordeyne that if ony persone make ony compleynt to myn executores that I have purchasyd ony taylid londes be this my will ordeynid to be sold,[153.2] and that thoo personys that so compleyne doo suffeciently and evydently prove and shewe withoutyn ony collucion, fraude, or male ingyne suche londes taylid; thanne I will that the right heyris purchase as be suche taylid londes, if ony be in my possession or in my feffeez handes, and that for a . . . . . . is thanne ony othir persone after the avyse and discrecion of the seid John Paston and Thomas Howis, clerk, and where there be no lawefull answere nor debarre of the tayle.[153.3]
Item, I will and ordeyne that the holy place of monastery and abbathye of oure Ladyiz chirche of Langley, in the diocise of Norwiche, for my soule to be more specialy recommendyd, and also for to kepe and susteyne, one day in the yeer, myn annversary solempnely be note the derige and messe of requyem for ever to endure for the helthe of my soule and for the soule of Dame Milcent, my wif, the doutyr of Sir Robert Tibetot, Knyght, whiche was of the consanguynite and kyn to the foundorys of the seyd monastery, and she owyng a senguler affeccion and love of devocion to the preyeris of that place, that the Abot and Covent have a reward and a remuneracion of my mevable goodes aftyr the discrecion of myn executores before namyd.
* and that oon of the monkis or pristes in the collage be me ordeynid in the mancion of Castre forseid shall synge specialy in perpetuite for the soule of my modir and all here auncestryez, and good dooerys.
Item, I will and ordeyne that be the avise of myn executorys before namyd, that prevecion and ordenaunce be made that the obit and annversary may be yeerly inperpetuite kept with placebo and derige and messe of requiem benote for the soule of Dame Mary, my modir, in the chirche of Attilburgh, * [and a fundacion of a messe there, or in othyr convenyent place to be morteysid, for ever to seye and preye for here soule and for here auncetryez aftyr the discrecion of myn executorys.] *
Item, I will and ordeyne that it be provided by myn executores before namyd a reward as a yefte be made to the chapell of Seynt Jorge in the Castill of Wyndishore, and to the collagyens of the same collage for to have my soule recomendid amonges . . . . . with an annversary to be kept yeerly and perpetualy amonges hem with placebo and [derige and] messe of requyem be note.[154.1]
* be the avise of myn executores before namyd