Item, I will, ordeyne, and comaunde that myn [executores and][154.2] feffeez* porsewe lawfully my right and title that I have in xxv. marke of yeerly rente, with all the areragis that of right and concience is dewe to my feffeez feffyd there in to myn use to dispose for my soule helthe chargyd and payable out of a maner in Hiklyng, callid Nethyrhalle, with the priour and covent of Hiklyng for the tyme beyng, be bounden and astrict be wryting undyr here covent sealys to paye yeerly. And on lyke wise I wyll that pursewt be made be Parlement or othyrwise lawefull for redressyng of the wrong doon to me in the maner of Bradwell, in the hundrid of Lodynglond in Suffolk, whiche I purchasid trewly, and hadde a lawefull astat in the same maner, as myn evydence woll shewe of record, xl. yeer past; and for to redresse the wrong full entre doon . . . . . my feffeez in the maner of Dedham Nethirhalle by Willyam, late Duke of Suff[olk], as well as for the wrongfull entre eftsonys and late made upon serteyn personys feffyd to myn use in the seyd maner, now of latter tyme; And that myn executores doo dewly here deligence aboute the recovery and getyng ageyn of the seyd manerez, lond[es], and tenementes and rentes above seyd of my goodes to be born.
Item, I will and ordeyne that the wardeyn and the procutoris for the tyme beyng of the parishe chirche of Seynt Oloff in Suthewerk, be London Brege, beyeng to the use of the seyd chirche of Seynt Oloff, be preferryd, in beyeng and purchasyng of myn executorys before namyd, a tenement with a warff thereto longyng, set be the seyd chirche, callyd the Bukheed, before ony man, and for a lesse valewe than it is worthe withine the sum of xxli.
Item, I will that a convenyent stoon of marbill and a flat fygure, aftyr the facion of an armyd man, be made and gravyn in the seyd stoon in laton in memoryall of my fadyr, John Fastolf, Squyer, to be leyd upon hese toumbe in the chapell of Seynt Nicholas, in the parishe chirche of Jernemuth, and with my skochonys of armys of hym and hese auncestryez, with a scripture aboute the stoon makynge mencion the day and yeer of hise obite.
Item, I will that in semblable wise a marble stoon of a convenyent me . . . . . . . . . . made to be leyd upon the toumbe of Dame Mary, my modyr, in the . . . . . . . . foundid in the parishe chyrche of Atilburgh, and that a figure . . . . . . . . . . of a jentilwoman with here mantil, with a scripture made of laton in on . . . . . . . iiij. skochonys of armys of here iij. husbondes, as the skochon of Thomas Mortimer, Knight, [John] Fastolf, Squyer, the seconde husbonde, and of John Farwell, Squyer, the thridde husbonde, auncetryez in the seyd toumbe, and the day and yeer of here obite to be wretyn aboute.
Item, that myn executores before namyd helpe that the maner of Cowlynge be disposed and guydid aftyr the will of Dame Marget Brannche, my sastir, if my executoris thynke it be to doo.
* [Item, I will that a provecion be made for swerte of the maner of Cowlynge in Suffolk, accordyng to the last wyll of Dame Marget Braunche, my sustir, in whiche maner I stond enfeffed in to here use, and serteyn londes in the seyd Cowlynge that Dame Mary, my modir, purchasyd to here and to hire heirez, that Herry Braunche, my neweu, here son . . . . seyd maner, provided that he be oblygid to preye for hise fadir, Sir Philip Br[aunche, and his] modir, Dame Marget, serteyn preyeris and messez, with a prist, to be contynw[aly] seyd [be] the discrecyon of myn executorys.] *
Item, I will and ordeyne that the executores of John Wellys, aldreman of London, whiche hadde gret goodes of myne in hise governaunce whil I was in the partyez of Fraunce and Normandye, and hadde never opyn declaracion to whos handes of my resseyvoris atturnyez, or servauntes of myne the seyd goodes were delyvered particlerly, and for that cause to be aserteynid of the trouthe in this be halve, as well as for the dyscharge of the seyd John Wellys soule, his executores and attornyez may yeve accompt, soo declaryng of my seyd goodes accordyng to the trouthe and concience.
* [Item, to be providyd, if it be thowght comodiously that it may be doon be myn executores, that a chauntry may be foundyd in the chyrche of Seynt Oloff, be London Brege, in Southewerk, to prey for my soule perpetualy.] *
Item, I will and requyre that it be knowyn to all pepill present and for to come that where afore thys tyme whil I dwellyd and excersysed the werrys in Fraunce, Normandye, Angoy, and Mayne, as in Gyen, havyng undir the Kyng, myn sovereyn Lord, officez and governauncez of cuntreez and placis, as of castilys, fortreys, citeez, and townes be xxx. yeer and more contynwed, be reson of whiche officez . . . . . many sealis of myn armys gravyn with my name wretyn aboutyn . . . . . . . . . . . course (?) in the seyd castilys and fortreycez that my lef tenauntes and . . . . . officerz beyng in dyverse suche placis ocupied undyr me the sealys and sygnettes to seale saf conduytez and billettes of saf gardes, and othyr wrytinges of justice longyng to suche officez of werre; and I doutyng that summe of the forseyd sealys of armys or sygnettes remayne stille amonges myn officeres or personys not delyvered to me ageyn, and that with the sealys of armys and signettes ony monwements, chartrys, dedes, letterys patentes, blankes chartrys in parchemyn or paper, or othyr evydence forgyd and contryved withoute my knowynge or assent, myght soo be sealyd ageyn all concience and trouthe and ryghtwisenesse; and for these causez, and for doute of ony inconvenyent that myghte falle be this my wrytinge, I sertefie for trouthe and afferme on my soule, I swere and proteste that sethe I cam last out of Fraunce and Normandye, xix. yeere passed, I never sealyd wrytinge of charge, yefte, nor graunte with noon othyr seal of armys nor sygnet thanne * I have usyd this ij. yeer day last passed. * [with this same seal of armys and sygnet . . . . . . . . . this my present will and my last testament],* and overmore that I have enselyd no [charge] yefte, nor graunte be the space of xix. yeer with noo seal nor sygnet, of noo lordshype, maner, nor manerez, annuite, reversionis, nor of no yiftes nor grauntes of goodes and cattellys, mevable and on mevable, nor mony, excepte suche as I have made opynly to be knowyn, executyd, and put in pocession be fore this day. Wherfore I requyre . . . . . . all Cristyn peple to yeve noo feithe nor credence to ony pryvat wryting not opynly declarid nor provid in my lif tyme, nor to blanke chartrys sealyd in my . . . . . . . whereof I remembre me well that oon John Wyntir, Esquyer, late my servaunt, hadde (?) in kepyng a blanke letter in parchemyn ensealyd ondyr my seal, and never delyvered it me ageyn, but seyde he hadde lost it at hyse confecion, as wryting ondyr hise owyn hande maketh mencyon or he deyde.
Item, I will and ordeyne that myn houshold be holdyn and kept with my menyal servauntz be the space of half yeer aftyr my deseas, soo as they wyll be trewe to me and obedyent to myn executorys, and here wages for that tyme payd, and that in the meane tyme they purvey hem for othyr servise as they lyke best to avise to leve in trouthe; and if ony servaunt be well governyd and holde ageyns my . . . or ageyn myn executorys to breke my good disposecion, I wy[ll that he shall be?] remevyd, and that he abyde noo lenger among the fel . . . . . . . . . . trewly avoydid withoutyn ony reward of me or of myn ex[ecutores].