[293]
SIR JOHN FASTOLF TO JOHN PASTON[37.1]
To my ryght trusty cosyn, John Paston.
1455
JUNE 22
Worshypfull Sir and cosyn, I commaund me to yow. And lyke yow wete that accordyng to your desyre I sende John Russe to yow to hafe your informacion of such materis as shall be thought exspedient to be laboured yn your absence for the mater of Wentworth, and hafe geve hym in commaundment to entend it in all that he can or may. And, Cosyn, he hath a lettre of credence to the baylly of Dedham because of doubt of syght of the baylly ys lettre ther for disclosyng, &c., to do after the wrytyng of T. Denys. And y sende yow ij. lettres com to me from London that maketh mencyon of grete besynesse ayenst us, and an accion toke ayenst yow, Howys, Bokkyng, &c., that most nedys be tendred; in case an essoyn[37.2] can be take, so moche the better. And therfor, cosyn, at reverence of God, dispose yow to London yn all the haste that ye can. For the atthacment can not be tille ye com. And on partie adverse besyeth hem sore in your absence, facies hominis facies leonis. And I have worde yn a nothere lettre that my Lord Chauncellor ys yn the lyke wyse disposed yn owre one syde, and therfor that ye kepe hym ynne to helpe bere the favour of thys mater yn all wyse; And Byngham Justys ys full well disposed also. Dyvers new processe ys ayenst Sir Thomas. And all othere materis I commyt to your discrecion; yf nede be, I com thedre my sylf. Y pray God kepe yow. Wryt hastly uppon Sonday before Seynt John Baptiste.—Your cosyn, J. Fastolf.
Item, after that I have word from yow, so wolle I be gouverned, and com to London yff ye sende me worde, and that I hafe word from yow yf nede be bytyme from London.
[37.1] [Add. MS. 34,889, f. 171.] There can be no reasonable doubt that this letter is of the same date as [Nos. 289] and [290], i.e. of the year 1455.
[37.2] An excuse allowed for not appearing in Court.
[294]
JOHN JENNEY TO JOHN PASTON[38.1]
To my wurshipfull maister, John Paston, Esquier.
1455
JUNE 24