Item, I was thys daye with myn Lorde of Norwyche at Thorppe, and informyd hym of the demenyng of the mater for Drayton chyrche, and of alle the demenyng and parcialte of Master John Solatt and Ypswell; and also I informyd what disposission that they were of that were upon the quest. Lete yowr counsell comone with hym, but thei may sey they knowe not myn evidens nor titell, ner have no mor to do by my writynge that I sent yow thanne to avyse hough I shall take myn accion, and that in that accion I have as good titell as my Lord of Norwich hath to the chirch of Thorp. And in good feyth me thynkyth by hym that he is ryght ille plesyd that the mater was so gydyt. He seyde to me ryght pleynly that the Jugis dede not therin as thei owght to do, and he seyd thowe I hadde hade noo councell, the he howght of ryght to have assyngyd me councell suche as I hadde dyssyrid; but he seyde he wyst well he dede in that mater as he have do in other materys byfor. Me thynkyth by suche thynges I harde ther that the seyd Master John ner the tother is not grettly in conseyt at thys tyme; and so tolde me Aschefylde in councell. What the cause was he myght have no leyser to telle me. I mevyd my lorde in the mater acordyng to the intent of yowr wrytyng yf aney axcion wer take; and he seyd feythefully yf it myght prevayle yow, he woulde with ryght good wylle that it choulde be doo; and ellys he woulde not in noo wyse that it choulde be doo. And he dyssyryde me to sende to hym suche as be of yowr councell lernyd, that they myght comune with hym therin, for he seyd he woulde not ye choulde take non axcion therin withowt it myght provayle. He was well payed that I tolde hym that ye woulde not do therin withowt hys knowleche and assent; and he seyd he woulde do therin as he woulde do yf the mater wer hys owne. Be avyse of yowr councell, I purpose to sende Loumnowr and Playter to commone with hym therin. He seyd he woulde feyne that ye wer owt of troble; and he seyd, yf he myght doo owght to helppe yow forwarde in aney of yowr materys, he swore by heys feythe he wode do hys parte feythfully therin. Episcopus apud London. He purp[o]syd to be at London thys terme, and thanne he seyd he woulde speke with yow of maney thyngs; he wycheyd herteley that he myght have spoke with yow on owr. He mevyd to me of a mater of a jentyllman of Cornale. Cornwayle He seyd he woulde speke with yow therof her after; yf it myght be browt to, it myght do meche good in maney thyngis. I harde yow onys speke of the same; ye tolde me ye hade be mevyd to therof by other.
Item, I received at letter frome yow yesterday, wherof I thanke yow hertely, and I praye yow that I maye be as ye writt. And as for suche materys as Sir Thomas Howys choulde be spoke to for[194.1] I sent Ric. Calle this day to speke with hym, but he myght not speke with hym; but as hastely as I may I challe do myn parte to spede the erands and other. Ecclesia de Mautby. It is tolde me that Sir Thomas wyll ressyng Mautby chyrche, and yf it plesyd yow to geve it to on Sir Thomas Lyndis, I truste verely that ye choulde leke hym ryght well, for he is rit a prystly man and vertusly dysposyd. I have knowe hym this xx. yer and mor; he was brother to the goode parsone of Seynt Michellys that ye lovyd ryght well; and yf he myght havyt he woulde kepe an howsolde therupon and bylde (?) well the plase (?); and therof have it grete nede, for it is now rit evyll reparyd, and I wott well he woll be rulyd and gydyt as ye wyll have hym. Wursted. I praye yow, yf it plese yow that he have it, that it lekyth yow to sende me an answer by the berrer herof.
Item, I have do spoke for yowr worstede[195.1] but ye may not have it tylle Halowmesse; and thane I am promysyd ye challe have as fyne as maye be made. Ric. Calle challe bryng it up with hym.
Wretyn the Fryday next before Michelmas day.
[191.1] [From Paston MSS., B.M.] This letter is apostyled in the handwriting of John Paston, and numbered ‘IIII.’ at the head, showing that it is of the same sequence as the next, which is numbered ‘V.’ and dated on the very same day. In fact, the latter is clearly nothing but a postscript to this, and bears the address upon the back, which this does not.
[192.1] Gilbert Debenham, senior, Esq.
[192.2] Sir Gilbert Debenham.
[193.1] So in MS.
[193.2] 6th October.