"Na, na," replied she; "I dinna mean that you should be the faither o' the child; but ye may be the means, in higher hands, o' gettin back its faither, and thereby relievin me o' a' my burdens and a' my sorrows thegither."
"Nae man likes to do guid better than I do," replied I, wi' a decent complacency, "though I hae been sair defamed. Come awa wi' me, an' tell me your story."
I took the puir woman hame, and, seein she was filled wi' naething but sorrow, ane o' the maist inflatin o' a' the non-naturals (for Hippocrates himsel couldna doubt that it's ane o' them,) I supplied her wi' as muckle victuals o' ae kind or anither—no bein very particular about the agreement or concurrence o' the elemental parts o' the polymixia or combination—as I thought would hae the double effeck o' gettin quit o' her hunger and her sorrow thegither. The puir creature ate like a rhinoceros. I doubt if she had had any meat for a week. Cakes, milk, cheese, herrings, tea, and honey, a' disappeared; and naething remained but a blush o' shame on her bonny cheek, to tell how muckle abashed she was at her good appetite. Some ungracefu minded folks wad ha ta'en the sweet suffusion that covered her face, for the mere effect o' the fecht or warstle o' devouring sae muckle meat; but my delicacy suggested a truer, a mair feminine, and a mair gallant conclusion. I was sae muckle pleased with the refinement o' mind that led to this discovery, that I couldna help bringing't oot—for nae man should hide his candle under a bushel—
"Ye needna be ashamed, my bonny woman," said I, "at eating sae muckle; for, though it's no paid for, ye're perfectly welcome to it, ample and multitudinous as it is."
This had the desired effect; for the blush was instantly succeeded by a deadly paleness. I then asked her what was her particular object, in wishin to see and speak to me privately. It was some time afore she could answer—overcome, I fancy, by her admiration o' my delicacy o' sentiment; but at last, takin out a ragged handkerchief, as a kind o' preparation for a scene, a thing I like abune a' things—exceptin, maybe, that in the Warlocks' Glen—she began—
"I am the dochter o' an honest farmer, that lives down near the Tweed. His name is Arthur Græme; and my name—that is my maiden name—is Lucy Græme. He was ance accounted rich, and I was—no lang syne yet—considered to hae some claims to beauty—twa things that hae produced a' my wae. I was courted by the neighbourin farmers, wha vied wi' ane anither for my hand and my affections; but, as a prophet has nae credit in his ain country, sae neeborin lovers were little respeckit. The gree was born awa frae them by a perfect stranger, kenned neither to them nor to me. A young man, ca'ed, at that time at least, Hugh Kennedy, whase looks were, alas! his best recommendation, if I shouldna speak of a soft honeyed tongue, whase sounds were music to my ear, recommended himsel to me at a neighbouring fair, and took frae me, whether I wad or no, my silly affections. He had heard o' my father's siller, and he saw my blooming face; but he never had the courage to come to our house and court me honourably, as my other wooers were glad and proud to do. Yet—strange backslidin o' the human heart!—I wadna hae gien a stowen kiss o' Hugh Kennedy, among the beech groves o' Sunnybrae, for a' the flatterin, wooin, and braw presents o' the rest o' my lovers thegither. The mere circumstance o' the puir youth being banned, as he was (for his secret courtship was sune kenned), frae the very neeborin woods, bound him to my heart the closer and the firmer. Though twenty een were upon me as gleg as hawks, and I was watched like a convicted thief, I saw him, spoke to him, wept wi' him, lay in his dear arms, and got my tears kissed awa wi' his burning lips."
Her throat got thick, and she paused. After some sobbing, she continued—
"Oh, forgie me, sir! To ye alane, wha hae my fortune in yer hands, wad I speak in this wild strain, for my heart is fu' o' love, grief, and a still revivin hope that winna dee. I never asked him a question, sae worthless and silly in the thoughts o' a lover, whar he wad tak me, and what he wad do wi' me, if I ran frae my faither's house, and married him. What cared I for things that were to come, when a' my joys were centred in the single moment when I was in his arms? Na, I never asked him whar was to be our bed—whar we were to get our dinner. Love had made me as light, as gay, as free, as thoughtless, as the birds o' the grove, whose food and raiment, hoose an' ha', are provided by nature, wha is kinder to them than to us proud human creatures. I need say nae mair. I flew frae my faither's hoose, was married and ruined. My husband had nae trade by the hand, nae friends, nae hame. He trusted to my faither's wealth; but that took wings and flew away as fast as his dochter. We lived thegither, Gude kens hoo, for twa years, when, ae mornin aboot six months syne, he rose frae my side an' left me, an' I hae never seen him since. A month after, I bore this babe, wha hasna yet seen its faither. I inquired for him in every direction, an' at last I heard that he was livin in this parish, an' was on the eve o' bein married to a braw lass, wi' a better tocher than I could bring to him."
"This is a sad story, Lucy—Mrs Kennedy, I mean"—said I. "Your treacherous husband, and his unconscious victim, this second wife, whoever she may be, haena gien in their names to me yet, as clerk o' this parish; and Mr Meiklejohn is owre correct a man to marry them against the rules."
"Heaven be praised!" cried the poor woman. "I was afraid I might be owre late."