*
Serra pedum prodit Scarabæum et fissile cornu.
Dermesti antennæ circum ambit lamina caulem
Qui caput incurvum timidus sub corpore celat.
In pectus retrahens caput abdit claviger Hister.
Occiput Attelabi in posticum vergit acumen.
Curculio ingenti protendit cornua rostro.
Silpha læves peltæ atque elytrorum exporrigit oras.
Truncus apex clavæ, atque antennulæ Coccionellæ.
**
Cassida sub clypei totam se margine condit.
Chrysomela inflexa loricæ stringitur ora.
Gibba caput Meloë incurvat thorace rotundo.
Oblongus frontem et tenues clypei exerit oras
Tenebrio. Abdomen Mordellæ lamina vestit.
Curta elytra ostentat Staphylis caudamque recurvam.
***
Tubere cervicis valet, antennisque Cerambyx.
Pectore Leptura est tereti corpusque coarctat.
Flexile Cantharidis tegmen, laterumque papillæ.
Ast Elater resilit sterni mucrone supinus.
Maxillâ exsertâ est oculoque Cicindela grandi.
Bupresti antennæ graciles, cervice retractâ.
Nec Dytiscus iners setosâ remige plantâ.
Effigiem cordis Carabus dat pectore trunco.
Necydalis curto ex elytro nudam explicat alam.
Curtum, at Forficulæ tegit hanc, cum forcipe cauda.
Hemiptera.
Dimidiam rostrata gerunt Hemiptera crustam
Fœmina serpit humi interdum, volat æthera conjux.
Depressum Blattæ corpus venterque bicornis.
Dente vorax Gryllus deflexis saltitat alis.
Rostro Nepa rapax pollet chelisque. Cicada
Fastigio alarum, et rostrato pectore saltat.
Tela Cimex inflexa gerit, cruce complicat alas.
Notonecta crucem quoque fert remosque pedales.
Cornua Aphis caudæ et rostrum, sæpe erigit alas.
Deprimit has Chermes, dum saltat pectore gibbo.
Coccus iners caudæ setas, volitante marito.
Thrips alas angusta gerit, caudamque recurvam.