NOTÆ IN CAP. II.
Brittania Magna, &c.] Ab Aristide Rhetore simpliciter MAGNA vocata INSULA,[163] etiam a priscis Hiberniæ incolis[164]. jam vero peractis tot seculis, totque revolutionibus ac mutationibus vetus suum nomen MAGNÆ BRITANNIÆ hodie vindicavit.
A Chrysosthomo authore Græco.] Probabiliter Dronem Prusæum Chrysostomum cognominatum celebrem Oratorem putat, contemporaneum Trajano Imperatori, ejusque triumphi participem[165], qui in Geticis suis, vel aliis operibus jam deperditis id assertum ivit. In epitome Strabonis a Hudsone publicata Vol. II.[166] epitheton Magnæ reperio pag. 21 & 38. additum ab Epitomatore. verum inde concludere Chrysostomum hunc appellari nimiæ foret audaciæ. verum est, Johannem Chrysostomum in plurimis scriptis suis Britannicarum insularum injicere mentionem, nusquam vero adjunxit Britanniæ ipsi cognomen Magnæ, nisi aciem oculorum meorum effugerit[167].
Natura triquetra, &c.] ‘Inter Septemtrionem & Occidentem projecta, grandi angulo Rheni ostia prospicit, deinde obliqua retro latera abstrahit, altero Galliam, altero Germaniam spectans: tum rursus perpetuo margine directi littoris ab tergo abducta, iterum se in diversos angulos cuneat triquetra, & Siciliæ maxime similis, plana, ingens, fecunda,’ &c.[168]. Opinio a Cæsare accepta[169], & plurimis, qui eum sequuntur, auctoribus propagata, verbi causa, a Diodoro[170], Strabone[171], &c.
Unum latus est contra Galliam Celticam, &c.] Id est, tota Britanniæ ora Meridionalis ad Canalem Britannicum sita & Galliæ opposita, juxta verba auctoris, ex Cæsare[172] desumta.
Ad Cantium, &c.] Infra lib. I. cap. VI. § 5. & 7. describitur; vulgo, the North Foreland of Kent.
Ad Ocrinum, &c.] Infra lib. I. cap. VI. § 16. ejus mentionem facit, hodie the Lizard Point, navigantibus notissimum.
Ad meridiem & Hispaniam Tarracon:] Revera ita est, vergit enim in linea recta ad Cabo de las Pennas. Illustrat hoc Agathemerum, qui lib. II. cap. IV. de Geographia, ita loquitur: ‘Albion, in qua castra etiam exstructa, maxima et longissima est. siquidem incipiens a septentrionibus accedit medium Tarraconensis, ad orientem usque ad media ferme Germaniæ.’
Millia Pass. D.] Secundum dimensiones recenter factas 367 milliaria Anglicana Regia dimensa[173], quæ CCCC Romana efficiunt, hæc longitudo est lateris, quam Ricardus noster infra ei tribuit. Attamen illa a Cæsare tradita longitudo non est nimia, parumque a vero aberrans, si per ambages oras maritimas mensuraverimus, respectu ejus quam Diodorus exhibet VII. M. D. Stadiorum[174], aut DCCCC.XXXVII. milliarium cum dimidio, aut Strabonis VM. Stadiis[175], quæ tamen DCXXV. milliaria Romana sunt.
II. Alterum latus, &c.] Latus Occidentale Britanniæ.