Pedro de Toledo, II testigo.
El dicho Pedro de Toledo, natural de Yepes, testigo presentado, syendo preguntado por el dicho ynterrogatorio, dixo e declaro lo siguiente:
A la primera pregunta dixo, que conosce al dicho Almirante e al dicho fiscal Gonzalo Velazquez; al dicho Almirante puede aver treze o catorce años, e al dicho fiscal que le a visto en esta cibdad pocos dias a.
Preguntado por las preguntas generales, dixo, que no es sobornado ni es pariente, etc., e ques de hedad de quarenta e dos años.
A la segunda pregunta dixo, que a oydo dezir lo contenido en la dicha pregunta a muchas personas, en especial á muchos marineros que á la sazon fueron con el dicho Almirante e que no se acuerda los nonbres dellos e que por publico e notorio se lo dixeron.
A la tercera pregunta dixo, que avra treze años que veniendo este testigo con el dicho Almirante don Cristoval Colon a descubrir por las partes del mar Oceano, que surgieron en la ysla de Guadalupe, e que entonces oyó dezir al dicho Almirante e al adelantado su hermano e otras muchas personas como el dicho Almirante avia descubierto aquellas yslas contenidas en esta pregunta.
A la quarta pregunta dixo, que al tienpo quel dicho Almirante don Cristoval Colon vino con las naos en esta pregunta contenidas, queste testigo estaba en Cadiz e lo vio venir, e despues quando este testigo vino a la ysla Española oyó dezir a marineros e a otras muchas personas como el dicho Almirante avia descubierto esta ysla e las otras yslas contenidas en esta pregunta.
A la quinta pregunta dixo, queste testigo fue en un viaje con Cristoval Serrano a la boca del Drago e a la provincia de Paria, e que alli oyó dezir que las provincias en esta pregunta contenidas heran todas en una costa donde agora dizen Tierra firme al dicho Christobal Serrano, e a Morales el piloto e á los yndios que andavan con ellos, que heran de la tierra.
A la sesta pregunta dixo, que lo oyó dezir como en la dicha pregunta se contiene á Andres de Morales, piloto, e a otros que no se acuerda.
A la setima pregunta dixo, que estando este testigo en Castilla oyó dezir lo contenido en la dicha pregunta a muchas personas de las quales no tiene memoria, e a marineros que a la sazon venieron con el dicho Almirante en aquella armada en esta pregunta contenida.