A la otava pregunta dixo, que a oydo dezir todo lo contenido en la dicha pregunta a marineros que conversan por estas partes del mar Oceano e que no se acuerda de sus nonbres.
A la novena pregunta dixo, queste testigo fue a Veragua en un viaje con el dicho Almirante don Cristoval Colon, que avra treze años poco mas o menos, e que oyó dezir quel mismo Almirante don Cristoval Colon les avia mostrado la navegacion e otras cosas para yr a descubrir a las partes de tierra firme, porque el dicho Ojeda e Juan de la Cosa avian andado con el dicho Almirante.
Preguntado a quien lo oyó dezir, dixo que al mismo Almirante don Cristoval Colon se lo oyó dezir.
A la dezima pregunta dixo, queste testigo a estado en Paria e en Veragua, e que avra treze años poco mas o menos como dicho tiene, e que por los vientos de la navegacion é por lo que a visto de la carta del navegar sabe lo contenido en la dicha pregunta, pero que no a estado en el Darien ny en Uravá.
A la honzena pregunta dixo, que dize lo que dicho tiene, e questo es lo que sabe, etc., e no firmo porque dixo que no sabia escribir.—Licenciatus Ybarra.—Francisco Tostado, escrivano.—Francisco de Cifuente.
Juan Terrón, III testigo.
El dicho Juan Terron de Posada, natural de la Montaña, cerca de la Redonda, valle de Cobre, testigo presentado por parte del dicho Almirante, syendo preguntado por el dicho ynterrogatorio, dixo é declaro lo siguiente:
A la primera pregunta dixo, que conosce al dicho Almirante é no conosce á los demas contenidos en la dicha pregunta; que no es criado ni pariente de ninguna de las partes, etc., e ques de hedad de treynta años poco mas o menos.
A la segunda pregunta dixo, que a oydo dezir lo contenido en la dicha pregunta á muchas personas e que lo dezia por publico e notorio.
A la tercera pregunta dixo, que a oydo dezir lo contenido en la dicha pregunta a muchas personas por publico e notorio.