JHESUS.
Je sui tout prest, sire, s’ous plaist
Ma mére et vous.
NOSTRE DAME.
Oil certes, mon enfant doulx.
Alons men, sire.
JOSEPH.
Or alons, que Dieu nous gart d’ire.
Il n’y a pas de ci granment;
Nous y serons assez briement.
Venez, biau filz.
JHESUS.
Pere, soiés certains et fiz
Que g’y vois moult tres voulentiers.
Avançons nous endementiers
Que temps avons.
NOSTRE DAME.
Vezci le temple où nous alons.
Biau filz, tout bellement venez;
Pour Dieu, de moy près vous tenez.
Je vous en pri.