Liziart bien saichant que verité lui disoit, moult courtoisement lui respondist que elle lui disoit verité, et lui promist sa foy que a tousjours mais sa terre et son avoir lui habandonnoit, et lui dist : « Je cognois et sçay pour certain que se vous ne fussiés je eusse perdue toute ma terre. Car oncques de la belle Euriant je n’eus mon plaisir ne ma volenté accomplie dont il me desplaist. Au fort puis que ainsi est et que autrement ne peult estre il me souffist ; puis que j’ay toute sa terre il ne me chault de riens : elle est mienne et par vous m’est venu ce bien, raison est que le recongnoisse. Girart lui estant au feu escouta et oyst tout au long ce que Liziart avoit dit, que oncques de lui ne se prirent garde, ja soit ce que les paroles qu’ilz dirent et profererent ensemble Liziart et la vielle leur seront a la fin chier vendues, comme cy apres porrez oyr en ceste hystoire.
Alors que Girart eust oy et entendu la maniere et comment lui et s’amye avoient esté traÿs, au plus tost qu’il peust, sans congié prendre, se departist de la court et vinst en la ville ou il ne demeura gaires jusques a ce qu’il vinst a la porte et saillist dehors es champs, tousjours la viole a son col, tant joyeulx des nouvelles qu’il avoit oyes que merveilles, et ne cessa de trocter tant qu’il fust arriere en l’ostel du jongleur ou il avoit esté si bien festié ; lequel lui vinst au devant et lui demanda comment il avoit besongnié et comment si tost estoit retourné. « Amy, dist Girart, vous le saurez assés a temps. Mais non pas si tost que je vouldroye. » Lors Girart entra a l’ostel et se assist a table avec son hoste et son hostesse ou ilz firent bonne chiere de ce qu’ilz avoient. Apres ce qu’ilz eurent souppé ilz alerent dormir, combien que Girart ne dormist gaires car il ne fasoit que penser toute la nuyt, puis quant il fust jour il se leva et se abilla et le jongleur son hoste lui mist a point son cheval et le tira hors de l’estable. Lors Girart prinst congié de son hostesse et de son hoste et leur remercia la bonne chiere que faicte lui avoient, et puis monta a cheval et se mist en chemin, pensant en quelle contree il porroit oyr nouvelles vrayes de s’amye Euriant, et ne savoit quel part il la peust trouver ne querir, et de courroux et desplaisir qu’il prinst en lui commença a trambler en menassant Liziart, affermant en son coraige que s’il peult trouver s’amye, que corps a corps lui vouldra prouver qu’il a fait comme ung desloyal traytre.
Comment Girart de Nevers arriva en ung chastel en Ardenne.
Ainsi comme vous oés Girart l’enffant triste et pensif aloit chevauchant par pluseurs contrees. Si vinst en Bourgoingne ou il enqueroit savoir nouvelles d’Euriant s’amye. Quant la n’en peust savoir nouvelles il vinst a Paris et puis passa oultre et chevaucha par France et Picardie, puis vinst par le pays d’Ardene tousjours enquerant de s’amye. Si advint que apres ce qu’il eust pluseurs journees chevauchié, ainsi comme a ung vespre, il choisist ung chastel sur une riviere qui estoit moult fort, et bien mis a deffence a le veoir, et le pays d’entour sembloit estre en guerre car a deux lieuues alentour n’y avoit riens laboré ne edifié fors maisons brulees et destruites. Apres ledit Girart vist deux hommes a cheval armez tenans leurs espees en leurs mains et les escuz en cautel, comme se deussent combatre, qui estoient sur le pont tournez, puis apres en vindrent quatre de pié moult bien armez et embastonnez. Girart vinst a eulx et les salua bien courtoisement et leur pria et requist que pour la nuyt le voulsissent logier. Ilz lui respondirent que voulentiers le feroient, mais bien savoient que il ne leur en sauroit ja gré car, dirent ilz, « nous avons vivres a si grant dangier que vous ne serez pas receu comme a vous appartient, car impossible nous est de longuement tenir la place que nous ne ayons tous les testes coppees, car tant fort avons esté guerrié que en trois ans n’avons peu cueillir ne semer ung muy de blé, et nous fait mal de vous abregier pour ce que bien nous semblés homme de hault affaire. » « Seigneurs, dist Girart, puis que l’ostel me voulez prester ceste nuyt je vous mercie. »
Girart entra dedens la porte et passa le pont que quatre hommes leverent apres. Deux chevaliers le menerent ou donjon, et autres prisrent son cheval et le menerent en l’estable ou il n’y avoit orge ne aveinne fors ung peu de foing qu’ilz donnerent au cheval. Quant Girart entra ou maistre donjon il se merveilla de la povreté qui y estoit et de l’ostel qui estoit si povre, et se ala seoir sur ung coffre et regardoit les chevaliers qui se desarmoient de leurs arnois, qui fort estoient enruilliez, puis se vestirent de leurs robes vielles, rompues et dessirees. Apres ce qu’ilz furent revestus entrerent leans deux routes de chevaliers pailes et maigres moult povrement vestus qui menoient avec eulx une moult belle pucelle et advenant mais tant estoit povre et maigre de jeuner que les os lui parissoient ; trespovrement estoit paree et vestue et estoit estaincte et descoloree ; sa saincture estoit d’un tissu de laine, la boucle et le mordant estoit de cuivre ou de laiton, parquoy il sembloit assés que pas n’estoit de grant richesse. Quant Girart veist la pucelle il se leva et lui vinst au devant et la salua moult humblement. La damoiselle comme courtoise et saige lui dist : « Sire, Dieu vous doint honneur et bien car ceans ne le sauriez trouver, dont je suis moult doulante pour ce que je n’ay de quoy vous puisse festier, ne es autres gens de bien qui passent par ceans, dont j’ay au cuer grant douleur quant ne les puis recevoir ainsi comme voulsisse, combien que il y huit jours passés que ne fusmes si au bas, non obstant que encores ay de provision .vi. pains et deux gasteaulx, deux pertrix et quatre ploviers et ung berril de vin et autre chose ne sçay en ce monde de vivres, et nous est impossible de povoir plus tenir, et demain attendons l’assault d’une gent la plus layde la plus orde que jamais veissiez. » « Dame, se dist Girart, pourquoy est esmeue ceste guerre ? » « Sire, dist la damoiselle, verité est que le seigneur de ces gens que vous ay dit me veult avoir a mariage, mais premiers que m’y consente je ameroye mieulx estre arse en ung feu d’espines, car tant est lais et hideux a veoir que toutes les fois qu’il m’en souvient me fait paour, et de plus saige ne soubtil chevalier ne se porroit trouver. Il m’a mandé par ung sien messagier que demain au matin mettra le siege devant ceste place. Toute ma terre m’a essillee et gastee, mon pere et mes deux freres mors, dont je suis tresdoulante et courroucee et non sans cause pas on ne se doit esmerveillier se consentir ne me vueil de le prendre a mary. » Et lors commença de plorer en soy complaignant moult piteusement, disant : « O mon vray Dieu, a male heure fus oncques nee quant trouver ne puis chevalier qui pour moy se vueille combatre. Je n’ay parent ne cousin que si ozé soit de combatre contre cest anemy. Moult grant desir ay que son orgueil lui voye abaissier. Sire, ce dist la pucelle, se si bonne chiere ne vous puis faire que je deusse, je vous prie que me perdonnez, car le grant anuy que j’ay au cuer me contraint de ce faire, mais pour l’amour de vous et de l’onneur que nous avez fait de venir prendre la pacience ceans je mettray peine de moy resjoyr. » « Damoiselle, de ce que dictes, dist Girart, vous remercie ; je prie a Nostre Seigneur qu’il vous vueille reconforter, mais pour Dieu, ma damoiselle, vous prie que dire me vueilliez se le chevalier qui est vostre anemy, lequel vous tenez si oultraigeux et hardy, se vouldroit combatre a l’encontre de cellui qui vostre droit vouldroit deffendre. Saichiés pour verité que pour amour de vous et pour garder vostre honneur et vostre droit je mettray mon corps et ma vie par tel si que s’il me peult conquerre ou ocir et mettre a mort que vous et vostre terre mettrez a son commandement, et se ainsi est que je le conquiere, il sera tenu de vous rendre et restituer tous les dommaiges et interestz qu’il vous a fais, excepté ceulx qui sont mors, lesquelz jamais on ne peult ravoir. » La damoiselle respondist a Girart que bien estoit contente de ce faire, mais trop redoubtoit le chevalier pour la grant cruaulté de lui et dist : « Sire, humblement vous remercie du grant confort et ayde que me voulez faire. » La dedans avoit ung chevalier moult ancien et saige ; ayant oy les belles offres que Girart avoit faictes a la damoiselle, dist : « Ma damoiselle, bien devez louer Dieu et remercier le jeusne chevalier. Soyés contente et lui octroyés le champ de bataille, car je croy certainement que par lui serez delivree et nous tous du grant dangier ou nous sommes a present. » Quant la damoiselle eust oy parler le chevalier, elle prinst son gant senestre et le bailla a Girart, lequel le receust tres voulentiers, en lui disant : « Sire, mon corps, ma vie, ma terre et mon honneur je metz en la garde de Dieu et de vous, auquel je prie que telle grace vous vueille octroyer que puissiez au dessus de vostre entreprise et nous mettre hors de dangier.
Comment Galerant vinst a grant puissance devant le chastel de la damoiselle.
Apres ce que eust receu le gaige de la demoiselle tous ceulx du chasteau furent tres joyeux et firent aprester le soupper le mieulx qu’ilz peurent du peu qu’ilz avoient. Quant tout fust prest, tous se misrent a table, et soupperent tous ensemble Girart et la damoiselle avec les autres chevaliers. Quant ilz eurent souppé ilz firent ensemble pluseurs devises puis on ordena le guet et ala chascun en sa garde. Girart et les autres chevaliers qui n’estoient point du guet s’en alerent dormir jusques au matin que chascun se leva. La pucelle se vestist et mist a point le mieulx qu’elle peust, car celle nuyt n’avoit gueres dormy pour la paour et doubte qu’elle avoit de son anemy, et aussi tous ceulx de l’ostel. Quant Girart veist la pucelle empres lui plourant il se cuida lever du lit mais elle incontinent s’avança sur l’esponde du lit en disant a Girart : « Sire, Dieu vous doint tresbon jour. » Hastivement se leva et ly dist : « Belle, vous soyés la tresbien venue. » Puis se vestist et abila et puis alerent ensemble oyr messe bien devotement et puis retournerent et monterent sur les murs et es tours du chastel ; mais si tost n’y sceurent estre venus que toute la plaine ne fust plainne de gens d’armes ; puis regarderent par la porte et choisirent le seigneur d’eulx, lui .iii.e, qui commença a crier a haulte voix a ceulx du chastel qu’ilz lui rendissent leur damoiselle ou ce non il les fera tous mettre a l’espee et fera ardoir le chastel et la damoiselle dedans. Ceulx du chastel entendirent ce que le seigneur leur anemy disoit, dont tous eurent grant paour.
Girart les veant ainsi espaventez leur dist en sousriant : « Seigneurs, resjoyssés vous et vous reconfortez et reconfortez vostre maistresse et du surplus me laissiez convenir, car au plaisir de Nostre Seigneur, ainçois qu’il soit nuyt, cellui par qui tant avez eu de dommaige, de paour et de desplaisir feray repentir des griefz qu’il vous a fais. Faictes bonne chiere et n’ayés paour de riens. Faictes me apporter du harnois, qu’il soit bon et fort, ne me chault se elles sont enruillees. » Lors sans plus attendre lui apporterent arnois si bon que on sauroit deviser et l’armerent tresbien a son plaisir, et lui chasserent ungs esperons dorez, et lui misrent son escu au col, puis lacerent son eaume ; puis prinst son espee qui estoit tresbonne et tresfine, et puis monta sur son destrié tout couvert de sendal vermeil sans mettre le pié en l’estrié ne sans prendre aucun aventaige, dont tous s’esbaïsrent, puis fist le signe de la croix en soy recommandant a Dieu, puis fist ouvrir la porte et prinst congié de la pucelle et saillist hors du chastel la lance ou poing et chevaucha contre Galerant le seigneur anemis du chastel. Quant Galerant, qui tenoit le siege devant le chastel, vist venir Girart si bien en point il s’avança et lui dist : « Vassal, je te prie que me dies comment tu as non, car trop te tiengs hardy et outrecuidié quant par ton orgueil tu es venu pour moy combatre. Grant folie as entreprinse, se ne me veulx rendre le chastel et la damoiselle. » « Vassal, dist Girart, je vieng icy pour deffendre a l’encontre de toy le chastel et la damoiselle par laquelle suis cy envoyé. » Galerant respondist : « Vassal, je cuide que tu es son amy ; bien monstre a ton semblant que tu l’aymes moult chierement quant pour l’amour d’elle tu es venu morir, car nul fors que Dieu ne te peult garantir se a moy veulx combatre. » « Vassal, dist Girart, Je te dis que se tu es si hardy de moy combatre je te feray bel party, par ainsi que se tu me peuls vaincre ou occir je te feray baillier bons hostaiges de toy livrer le chastel et la damoiselle pour en faire a ton plaisir. Et pareillement tu bailleras hostaige souffisant que ou cas que je te conquiere ou mette a mort tu feras reparer et restituer tous les maulx et damages qui par toy et tes gens ont esté fais en la terre de la damoiselle et de ses hommes, et le feras amender a ladicte damoiselle entierement, et a ses hommes et subgetz. » Galerant respondist qu’il estoit tres content et qu’il ne demandoit pas plus bel pain, et que mieulx ne demandoit. »