Comment Girart combatist le chevalier et le desconfist vaillamment et a grant force.
Quant Galerant eust fait responce a Girart il lui dist : « Je te requiers que je puisse aler jusques a mes gens pour leur dire et racompter les devises faictes entre noz deux. Avec moy ameneray de mes hommes pour tenir hostaige et devant toy les feray jurer et promettre de entretenir les convenances faictes entre toy et moy ; et les feras entrer dedans le chastel affin que toy et la damoiselle soyez mieulx asseurés. » Girart dist qu’il estoit content. Galerant ala a ses gens et leur compta l’emprinse que Girat et lui avoient faicte, et prinst quatre de ses gentilz hommes et les amena a Girart et lui dist qu’il les menast ou chastel jusques a ce que leur champ de bataille seroit accomply. Girart fut content et les envoya ou chasteau et firent serement de entretenir de point en point les promesses et convenances faictes entre les deux vassaulx ; puis apres la damoiselle les fist enclorre en une tour et les fist garder par quatre hommes. Et elle et tous ses chevaliers monterent sur les tours du chasteau pour veoir le champ des deux chevaliers. Quant les ostaiges furent bailliez comme dit est, iceulx chevaliers prinrent leur course les lances es erretz et picquerent cheval d’esperon et vinrent assembler l’un contre l’autre qu’il sembloit une foudre, et tellement encontrerent qu’ilz rompirent leurs lances en plus de cent pieces et cheurent les chevaulx et les maistres par terre ou longuement demorerent tous estourdis, et tant que ceulx qui les regardoient d’un costé et d’autre disrent que oncques de deux chevaliers n’avoient veu ferir si beau cop de lance. Quant long temps eurent demeuré les deux chevaliers endormis a terre et tous estourdis se releverent l’espee ou poing et commencerent a combatre et frapper l’un sur l’autre tant qu’ilz fasoient partir le feu de leurs harnois, et se combatirent tellement et par si longue espace qu’ilz estoient tous en sang et en eaue et ne veoient quasi goute. Ilz laisserent leurs espees et se prisrent a bras et tant bouterent et tirerent l’un l’autre que tous deux cheurent a terre aucune fois l’un dessus l’autre dessoubz, et tant et si longuement luterent ensemble qu’ilz demeurerent comme pasmés si estoient las, et sembloient mieulx mors que vis par la force du sang et de la sueur qu’ilz getoient ; car il n’y eust cellui des deux parties qu’il ne pensast avoir perdu son champion et en menoient grant dueil. Quant ilz revindrent a eulx et qu’ilz furent arriere en force et vigueur, incontinent se leverent en piés et reprirent leurs espees et commencerent a frapper l’un sur l’autre et tellement combatirent qu’il ne leur demeura piece de harnois entiere. Oncques Roland et Fernagu ne combatirent plus fierement. Dont si mal en prist a Galerant qu’il tomba a terre. Quant Girart le vist rué jus, ung souvenir lui vinst de s’amye la belle Euriant, puis leva l’espee contremont et dist a Galeran : « Je te conseille, affin de ta vie sauver, que tu te rendes et me cryes mercy, car trop grant damage seroit de ta mort. » Alors Galeran plain d’orgueil et d’otrecuidance dist a Girart que encores n’estoit il pas temps qu’il se deust rendre et que combien qu’il feust a terre il se releveroit bien. « Vassal, dist Girart, ce sera grant merveille se sans mort tu me peuls eschapper. »
Adonc Girart lui coppa les esguillettes de son heaume et puis lui osta de la teste. Quant Galeran se vist en ce point desarmé et rué jus et que sa force ne lui povoit aydier, fust bien esbaÿ combien qu’il avoit grant coraige. Encores Girart qui le tenoit soubz lui [dit] que sa mercy vouloit avoir et que pour desconfy se tinst. « Vassal, dist Galeran, ja Dieu ne plaise que de ma bouche saille ung mot si villain ; tant que la vie auray ou corps par moy le mot ne sera dit. Je n’ay cure de tel mercy ; fiers tant que tu porras, je suis cellui qui la mort oseray bien attendre. » Toutesvoyes Girart eust volentiers trouvé maniere que galeran lui eust prié mercy, mais oncques icellui Galeran ne le voult faire. Quant Girart veist que en nulle maniere ne se vouloit rendre lui coppa la teste de son espee. Quant ceulx du siege virent leur seigneur mort grant desconfort menerent et pour entretenir leurs promesses vindrent a Girart en lui offrant corps et biens a le servir de tout leur povoir.
Comment la damoiselle vinst a Girart qui estoit moult fort navré et l’ayda a porter a l’ostel.
Apres ce que Girart eust desconfy Galeran, il se reposa car il estoit tresfort navré et las. Incontinent la demoiselle le veant reposer saillist du chasteaul bien accompaignee et vinst a lui et tant de joye comme de pitié commença a plorer et trouva Girart qui se reposoit empres le chevalier mort, lequel Girart estoit tant couvert de sanc par le visaige que a grant peine veoit il goute, dont la damoiselle estoit moult dolante, pensant qu’il deust morir et commença crier a haulte voix :
« O, vierge Marie, comment ce vassal est blecié ! s’il meurt ycy jamais en ma vie n’auray joye. » Et incontinent se aproucha de Girart, lequel estoit tant plain de sang et de sueur que il ne la povoit veoir et d’autrepart estoit comme pasmé. Quant la damoiselle le veist en ce point, commença a soy lamenter et dist : « Lasse, chetive, maleureuse, grant damage est que je suis vive, quant pour moy et pour ma cause il convient que ung si vaillant chevalier soit mort. »
Lors commença a soy tirer par les cheveux et a batre ses mains et menoit ung grant desconfort. Ainsi qu’elle menoit celle dure vie Girart revinst a lui qui estoit en grant peine et getta deux sospirs.
Quant la damoiselle l’oyst elle prinst ung fin couvrechief et lui essua le visaige, les yeux et la bouche ; quant elle l’eust essuyé il commença ung peu a ouvrir les yeux et la bouche et a grant peine commença a parler une voix casse et vaine et dist a la damoiselle qu’elle le feist emporter pour le desarmer et pour veoir ses plaies. La damoiselle lui respondist en plorant que volentiers le feroit ; adonc incontinent lui osta son escu et le ayda a emporter a l’ostel. Quant tous les gentilz hommes de Galerant virent venir la damoiselle, lui vindrent prier mercy en eulx offrant corps et chevance a la servir et lui firent hommaige.