Apres la damoiselle vinst ou chastel et fist desarmer Girart et le coucha en ung bon lit et puis le visita par tout le corps, ou y avoit pluseurs playes mais nulle n’en y avoit mortelle, lesquelles elle fist mettre a point bien et doulcement et fut bien joyeuse de ce qu’il n’avoit nulle playe mortelle ; et au surplus pensa de Girart le mieulx que possible lui estoit, et tellement que deans brief temps commença fort a amender et fut gary deans ung mois, et se leva du lit et lui souvinst de s’amye Euriant et lui prinst voulenté de soy partir et de prendre congié de la damoiselle car il vouloit serchier et enquerir de s’amye. Advint que ung jour il parla a la pucelle et lui dist : « Ma damoiselle, je suis gary, la mercy Dieu, j’ay esté pres de la mort pour les playes que j’ay receues, mais par vostre bonne diligence et par ce que si bien avez pensé de moy je suis en bonne santé, dont je vous mercie de tous les biens et services que m’avez fait.
Il m’est venu volenté d’accomplir ung voyage que pieça ay entreprins de faire ; parquoy je vueil prendre congié de vous, lequel vous me donnerez s’il vous plaist. Et s’il advenoit que aucun affaire vous survinst je seray prest de vous secourir pour tant que je en soye adverty de par vous, car comme a vostre chevalier me povez commander. Vous priant que, avant que me parte de vous, me vueilliez dire vostre nom. » « Sire, dist la pucelle, puis que mon nom vous plaist savoir moult voulentiers le vous diray : mon pere eust a nom Trargis et je suis appellee Engline. De mon pere et de mes freres avez prins vengence sur cellui qui a ses deux mains les avoit occis, dont a tousjours mais seray tenue et obligee a vous. Je vous prie aussi que vostre nom me vueilliez dire, et se vostre plaisir est de demeurer, ma terre, mes chasteaulx et tout ce que j’ay en ce monde vous est abandonné pour en faire a vostre plaisir, et moy mesmes me donne a vous pour estre vostre femme ou vostre amye s’il vous plaist, laquelle chose chier amy vous prie que vueilliez faire. Je suis de grant lignage, ja soit ce que dame ne damoiselle ne se doit prisier ne vanter. » Girart, qui aperceust assés qu’elle avoit s’amour en lui, lui dist : « Ma damoiselle, pour Dieu ne vous vueille desplaire. Car pour tout l’avoir de Constantin le riche empereur de Romme ne vouldroye laissier de faire le voyage que ay entreprins. » Quant la damoiselle vist que Girart ne vouloit point demeurer et que il avoit le cuer autrepart elle devinst toute pensive et ne povoit parler de desplaisir. Girart la veant en ce pensement la prinst par la main et lui dist : « Ma damoiselle, il n’est point possible que je puisse demeurer, » et lui conta tout son affaire, le grant anuy et la grant perte de sa terre qu’il avoit perdue, et encores plus plaignoit s’amye Euriant. Quant la pucelle oyst qu’il parloit de s’amye, oncques n’eust au cuer plus grant douleur, et dist : « Las moy doulante, comment poura mon cuer soustenir le desplaisir et peinne que j’ay a present et auray de perdre cellui en quy m’amour ay mise et en quy j’avoye toute mon esperance ! Maintenant voy je bien que j’ay perdue ma peinne de ainsi avoir mis mon amour en lui, combien qu’il me aist mis hors de grant maleurté et de grant peinne, si m’a il mis en plus grant mil fois, dont je en suis cause et est par moy, car c’est chose clere et chascun le scet que se il ne fust icy venu jamais il ne fust advenu que me fusse enamoree de lui. »
Ainsi comme vous oez la pucelle se excusoit. Puis apres dist en elle mesmes : « Bien appert que pas ne suis sage quant la coulpe en mettoye sur lui et moy mesmes m’en excusoye. Certes pas ne l’en dois blasmer, mais mon cuer qui a le amer m’a contraint et mes yeulx par quy j’ay esté traÿe ; lasse je en cuidoye estre au dessus, or voy je bien que je en suis bien loings. » Ainsi comme vous oyez se complaignoit la damoiselle. Et Girart a qui il tardoit moult soy de partir prinst congié d’elle et de tous ceulx de l’ostel et monta a cheval et se mist en chemin pour trouver et enquerir nouvelles de s’amye Euriant, de laquelle oncques ne peust trouver aucunes nouvelles.
Comment Girart se partist du chastel de la damoiselle et vinst a Chalon en Champaigne ou il fust long temps malade.
Ainsi comme vous avez oy Girart se partist du chastel et de la damoiselle et chevaucha six jours moult doulant triste et pensif, dont il fut tellement malade qu’il demeura au lit a Chalon en Champaigne en l’ostel d’un notable bourgeois ou il demeura moult grant espace de temps ; le boire et le maingier perdist, dont il devinst tant sec et tant magre que merveilles, et n’estoit riens qui le peust resjoïr tant pensoit a s’amye Euriant ; il se amoit austant mort que vif et finablement devint si au bas que a la fin il perdist toute cougnoissance et d’Euriant ne d’autre chose ne lui souvenoit plus. Et en fust bien doulant le notable bourgeois son hoste, lequel avoit une tresbelle fille, gente, courtoise, gracieuse et plaisant austant que faire se povoit, laquelle estoit ung jour assise en la chambre de son pere ou elle ouvroit d’or et de soye moult richement de florettes sur ung drap ; elle qui chantoit merveilleusement bien commença a dire une chançon et tant que en la chançon elle nomma Euriant. Girart qui estoit en son lit couchié oyst celle chançon et oyst s’amye nommer. Quant la chançon fut assouvye et que Girart l’eust bien entendue, il se assist sur son lit et commença a penser grant piece, puis dist : « Las moy, le mal que j’ay souffert m’a tourné a grant desplaisir ; je pense que jamais ne sauray trouver le lieu ne l’estre ou est m’amye ; bien voy que l’amour que lui avoye est obliee ; pas ne me merveille se je suis affoibly quant j’ay mis en obly celle qui pour moy a souffert tant de douleurs. Je me vueil efforcier jusques a ce que puisse aler par le pays enquerir d’elle ; se je me puis trouver fort, jamais jour n’aresteray jusques a ce que l’auray trouvee, et pour chose qui me puist avenir ne laray que ne l’emmaine se elle est en vie. » Et pour soy resjoyr et prendre courage commença Girart a chanter bien doulcement et tant que la fille de l’ostel l’oyst et s’en merveilla moult et l’escouta tres volentiers, et pensoit que Girart fust cheu en frenaisie comme il estoit.
La pucelle qui estoit courtoise vinst a Girart, lequel elle trouva assis dedans son lit, et lui pria bien doulcement qu’il se voulsist recouchier, en lui priant qu’il ne se voulsist troubler de ce qu’elle estoit la venue. « Belle, dist Girart, vostre venue m’est moult plaisant mais je vous prie que me faictes apporter a maingier. » Incontinent la pucelle lui fist du lait d’amandres et lui apporta, lequel il beust tresbien, dont la pucelle fut tres joyeuse. Puis il demanda a la pucelle se jamais avoit oy parler d’une damoiselle qui avoit nom Euriant ; la pucelle lui dist que oncque ne l’avoit veue ne congneue, ne que d’elle n’avoit oncques oy parler. « Sire, dist elle, je fus ores troublee quant ainsi vous oys chanter. » « Belle, dist Girart, c’estoit pour moy reconforter, car a celle heure il me souvint de celle pour qui ce mal m’est venu. Car nagaires en chantant la vous oys nommer. » « Sire, dist la pucelle, a ce que j’entens de vous le mal que si long temps avez eu vous est venu d’amer. »
Lors Girart lui raconta tout son fait, son anuy et sa grant perte et de Euriant s’amye. Quant la pucelle eust escouté Girart bien au long, elle lui dist : « Sire, a vous ne a autre n’aviegne jamais de vouloir esprouver s’amye. Il m’est advis que ung homme de grant façon peult assés tost faire une amye ; ligiere chose est de la furnir, mais de la bien savoir entretenir est le sens ; cellui qui se sent avoir bonne amye jamais ne la doit esprouver. » Girart oyant la ainsi parler la pucelle lui dist : « Belle, vous dictes verité, dont humblement vous mercie moult ; grant confort m’avez donné et avez esté mire du mal que si long temps m’a tenu ; tant par vostre parler que par vostre chanter m’avez mis au dessus. » Adonc la pucelle le fist recouchier et le venoit souvent visiter et si bien pensa de lui qu’il revinst en sa force.
Comment la pucelle fille de l’oste dona a Girart ung esprivier a prendre congié d’elle.