Incontinent que les dames du chasteau virent ceste grande armee elles envoyerent une messagire vers ladite armee pour sçavoir qu’ilz demandoient. Et le beau doulx respondit que la dame du chasteau avoit fait crier se quel c’un vouloit bien faire troys choses enjointes par ladite dame que il conquerroit ledit chasteau et qu’il en seroit maistre et seigneur/ et estoit icy venu pour sçavoir se il le pourroit conquerre. Et le messaigier retourna vers la dame et luy dist comme le chevalier estoit venu a cause du cry fait par son commandement. Quant la dame du chasteau sceut comme il estoit venu pour la conqueste/ elle envoya grant quantité de damoiselles vers le beau doulx & fut receu honnestement/ mais il entra seul audit chasteau et demourerent ses gens dehors dont il fut bien marry. Et quant il fut dedans ledit chasteau la dame vint vers luy rechement aornee et le salua honnestement. Et quant le beau doulx la vist luy qui estoit mirouer de toute humilité se mist a deux genoulx la teste nue et la salua treshumblement et la remercya de l’honneur qu’elle luy faisoit en disant que a luy ne appartenoit point qu’elle luy fist tel honneur. Apres plusieurs parolles dites elle luy demanda quelle chose il pretendoit parquoy il estoit venu a tout si grande compaignie de gens jusques audit chasteau d’amours. Et le beau doulx luy dist en ceste maniere. Treschiere dame j’ay entendu que vous avez fait cryer que quiconque vouldra faire troys choses par vous enjointes que il sera maistre et seigneur dudit chasteau. Et a cause que j’ay ouy dire tant de bien de vous je me suis mis a chemin pour veoir se par mon petit service je pourroye acomplir lesdites choses. Et quant la dame l’eust entendu elle luy remonstra les perilz dudit chasteau & que tant de gens de grant auctorité ne le peurent jamais conquerre disant ainsi. Chier amy sachez que denis le tyrant ne peult jamais conquerre cestuy chasteau aussi ne fist pas julian l’apostat/ gamelon/ ne sardanapalus/ ne plusieurs aultres/ car certes il est tant difficille a conquerre que a grant peine est il possible a vous de faire les choses lesquelles nous vous voulons enjoindre/ mais affin que vous soyés content de nous/ nous vous monstrerons nostre chasteau/ car nous vous trouvons le plus humble qui jamais entrast ceans/ parquoy nous ne vous voulons pas mettre en tel peril. Apres ce la dame mena le beau doulx veoir le chasteau lequel estoyt a l’environ fermé de murs de saphirs et au milieu avoit une mayson en maniere de palais/ laquelle estoit par dehors de rubis et de cristal/ et le dedans estoit de emeraudes/ les planchiez estoient de fin or/ & les tables de iacintes/ et les treteaulx de fin albatre/ le banc estoit d’ung dyamant/ le buffet estoit d’ung charboucle fait d’ung grant entendement/ la salle estoit pavee de grisopates/ de berilz/ d’acales/ de cusollites/ d’amatistes/ de gagates/ et de jaspres/ Il y avoit une court aussi pavee de marguerites/ et de medes et plusieurs aultres choses lesquelles seroient longues a racompter & difficilles a croire. Et quant le beau doulx eust regardé ses choses il getta sa veue vers la dame dudit chasteau laquelle luy pleust mieulx que nulles aultres choses que il eust point encores veues dedans ledit chasteau & luy dist. Treschiere dame je vous remercie humblement de ce que il vous plaist de me advertir des perilz de cestuy chasteau/ car certes je suis desliberé se c’est vostre plaisir de le conquerre/ et pource que par vous je sçay les perilz je m’en deffendray tant mieulx. Quant la dame congneut sa voulenté elle le fist mener en une tour avironnee d’eaue parfonde et bruyante comme ung gouffre marin. Et la commencerent a dancer et en ung moument il se trouva tout seul sinon qu’il vit une des dames qui ferma la porte et getta la clef au parfond de ladite riviere et luy dist. Se tu peulx saillir dehors de ceste tour tu seras maistre et seigneur du chasteau. Quant le beau doulx vit ceste chose il commença a faire plusieurs regretz et lamentations disant en ceste maniere. Dieu de lassus qui me creas sur terre et fait a ta propre ymaige et semblance/ ne souffre pas que je meure icy/ car je me repens d’avoir jamais entreprins ceste chose. Helas plaise vous estendre vostre grace et me regarder de l’ueil de misericorde. Et comme le beau doulx disoit ses parolles ou semblables les larmes luy sailloient des yeulx comme l’eau saulte de deux fontaines. Et adonc la cane a qui il avoit saulvé ses petis l’entendit et vint sur ceste riviere et voula jusques a la tour et luy dist. Chier chevalier dieu te gard/ ne te desconforte point/ car tu me fis une foys ung plaisir/ quant tu gardas que tes gens ne prinsent mes petites canes sur le bort de la riviere parquoy a ceste heure je te vois querir la clef de ceste tour qui est au fons de ceste riviere. Quant le beau doulx l’eust entendue il la remercya tresgrandement & la cane alla querir la clef au fons de la riviere et luy apporta. Et quant le beau doulx eust ceste clef la cane s’en retourna et il commença fort a penser a luy mesme et dire. Or voige bien que jamais nul bien fait n’est perdu et que qui plaisir fait plaisir requiert.
¶ Comment le beau doulx saillit hors de la tour et vint au chasteau dont la dame & les damoiselles furent fort esbahyes.
Quant le beau doulx fut hors de la dite tour il s’en vint tout droit vers le chasteau & trouva la dame/ et les damoiselles et moult humblement les salua. Quant elles le virent elles furent fort esbahyes comment il luy avoit esté possible de sortir de celle grosse tour/ et luy dirent. Chevalier vous avez bien acomply l’une des troys choses a vous enjointes puis le festoierent honnorablement & le menerent en ung jardin le plus bel qui oncques fust veu. Cestuy jardin estoit grant & spacieulx/ & estoient les murailles de fin albastre poli/ & avoit ceste dite muraille quinze toises de haulteur & six d’espesseur. En cestuy jardin avoit plusieurs nobles arbres fort odoriferans comme cypres/ romarins/ lavendiers/ rosiers/ esglantiers/ et plusieurs sortes d’erbes tresfort joyeuses et odoriferantes. Et certainement je croy que celuy qui l’avoit fait avoit l’entendement angelique/ car il n’est possible a nature humaine de faire mieulx. Au milieu de cestuy jardin y avoit ung buysson de esglantiers fleuris de espines & de romarins/ lequel estoit si espés que on n’y eust sceu a grant peine bouter le doy dedans. Et oultre il estoit si poignant que on n’eust osé bouter la main dedans tant estoient les espines aguez. Et quant elles eurent bien festoié le beau doulx elles allerent geter ung bichet de millet dedans ledit buysson puis luy dirent que il failloit qu’il amassast tout ledit millet dedans le jour ou aultrement il mourroit/ et demoura la tout seul puis il regarda le buysson & se print a plourer/ car il savoit bien que il n’estoit pas possible que homme humain peult en dix ans amasser ledit millet & print a dire en ceste maniere. Jhesucrist qui as fait ciel & terre & creé nature humaine veilles a ceste heure avoir pitié de moy/ car vrayement il est impossible a homme mortel de assembler a ung jour cestuy millet non pas en dix ans. Comme il plouroit & lamentoit vecy venir par dessus les murailles dudit jardin le roy des formis & amena toutes ses gens lesquelz estoient grant nombre et commencerent a saluer ledit beau doulx disans en ceste maniere. Noble chevalier dieu de gard. Et le beau doulx regarda par tout le jardin & ne vit rien dont il se esbahit/ car il estoit si petit que on ne le veoit point. Adonc le roy des formis s’approcha de luy et luy dist. Saches que je suis le roy des formis a qui tu fis une foys ung plaisir quant tu estois contre le boys ou je estoie en provission moy et ma compaignie & fis retraire toutes tes gens jusques a ce que ma compaignie fut toute retraite audit boys/ parquoy je suis icy venu vers toy a tout ma compaignie pour te secourir a ton grant besoing/ car l’homme a qui on a fait aucunesfoys plaisir en aucun passaige est bien ingrat et bien meschant se au besoing il ne le rent. Et incontinent il commanda a ses gens que chascun se efforçast de amasser ledit millet en ung tas/ parquoy chascun fist devoir en voulant rendre plaisir pour plaisir/ et incontinent tout ledit millet fut asemblé et le beau doulx remercya humblement le roy des formis et toute sa compaignie/ puis retournairent par dessus la muraille. Et le beau doulx se print a ymaginer comme celuy qui fait plaisir ne pert pas sa peine/ car aucunesfois on fait plaisir a quelc’un en aucun lieu que a cent lieues loing & a .xx. ans apres celluy a qui on l’a fait le rent bien & n’y pense on pas. Aussi quant on a fait desplaisir en le rent bien parquoy on dit communement au bout de cent ans retourne malan. Et quant l’heure fut passee laquelle on avoit enjoingt au beau doulx de amasser ledit millet les dames vindrent au jardin cuidant que il n’est rien fait mais il trouverent qu’il avoit tout assemblé en ung monceau dont les dames furent bien esbayes et le menerent au chasteau.
¶ Comment le beau doulx fut mené par les dames au chasteau et festoyé honnestement.
Le beau doulx fut honnestement mené au chasteau par les dames et fut festoié dieu sait comment et luy fut dit qu’il avoit acomply deux des choses enjointes par la dame. La dame du chasteau fist habillier deux de ses damoisselles et elle qui fist la troisiesme de habillemens semblables en couleurs et en façon et estoient lesdites dames de une haulteur et d’une grosseur/ et d’ung semblant de visaige et de maniere tellement que oeil humain n’eust sceu juger laquelle estoit la dame du chasteau et portoit ladite dame en sa main une rose naturelle. Et les deux aultres chascune une artificielle si bien faictes que n’eust personne sceu dire qui estoyt la naturelle/ on mena le beau doulx en une salle ou estoient lesdites dames & luy fut dit vecy troys dames entre lesquelles est la dame du chasteau se vous la pouvez congnoistre vous serés seigneur et maistre dudit chasteau/ ou aultrement il vous convient mourir. Le beau doulx fut plus esbahy que jamais n’avoit esté/ car il n’eust pas esté en puissance d’homme mortel de congnoistre laquelle estoit la dame dudit chasteau. Quant le beau doulx fut dedans devant lesdites dames ilz se prindrent toutes troys a dancer/ et le beau doulx estoit assis au pres d’une fenestre si triste et dolent qu’il n’eust possible de plus estre. La mouche a miel vint a luy & luy dist en ceste maniere. Noble chevalier prens celle sur laquelle je me asserray/ car tu gardas une foys mes petis de mourir quant tu passoies par le chemin. Et le beau doulx la remercia treshumblement/ et dist a luy mesme que qui plaisir fait plaisir requiert. Puis la mouche s’en vint criant parmy la salle et s’en vint asseoir sur la rose naturelle que la dame du chasteau tenoit. Et incontinent le beau doulx la vint embrasser fermement en luy disant. Or sont maintenant acomplies les trois choses par vous enjoinctes/ car je vous prens pour la dame & maistresse du chasteau d’amours/ parquoy furent toutes esbahyes comme a luy avoit esté possible de povoir congnoistre laquelle estoit la dame. A lors vindrent toutes vers luy pour luy faire honneur & reverance. Et la dame dudit chasteau le receut moult honnourablement et le fist maistre et seigneur dudit chasteau d’amours/ dont grandement la remercia. Parquoy seigneurs & dames qui se present livre lisez/ congnoissés que par humilité on parvient a grans biens/ et que bon est faire plaisir aussi bien au petit comme au grant/ car souventesfoys le petit rent plustost plaisir que le grant. Parquoy tous & toutes qui desirés avoir honneurs et richesses soyés humbles & liberaulx autant aux petis comme aux grans/ & vous parviendrés a acquerir le chasteau d’amours. C’estassavoir le royaulme de paradis comme fist le beau doulx lequel le conquist par l’humilité qui en luy estoit. Or prions le beau doulx/ c’estassavoir le pere/ le filz/ et le sainct esperit/ qu’il luy plaise par sa benigne humilité que puissions parvenir a acquerir ce noble chasteau d’amours.
¶ Amen.
¶ Comment l’acteur redigere la substance de ce present livre.
Apres que j’ay parlé du chasteau d’amours lequel fut conquis par la grande humilité du beau doulx j’ay ymaginé en mon entendement que par ce chasteau nous pouvons entendre plusieurs choses/ mais je ne descripray que de une. C’estassavoir que par ce chasteau j’entens le royaulme de paradis lequel royaulme a esté conquis plus par humilité que par autre chose. Nous avons que par la vraye humilité du filz de dieu lequel a esté en ce monde humble jusques a la mort a esté ouvert le royaulme de paradis. Aussi la benoiste et glorieuse vierge marie conceupt le sauveur et redempteur de tout le monde plus par son humilité que par sa virginité quant elle dist. Ecce ancilla domini/ sainct jehan baptiste dist aussi qu’il estoit le vray mesias en demonstrant sa vraye humilité si dist. Je ne suis pas digne de luy toucher aux courgions de ses souliers. Sainct roch qui estoit filz au conte de prouvence laissa tous ses biens pour servir les povres malades a l’ospital qui est signe de grant humilité. Et plusieurs gens lesquelz ont par leur humilité conquis le chasteau d’amours. C’estadire le royaulme de paradis auquel est l’amourt divine. Oultre plus nous avons de la royne hester laquelle fut si humble vers son mary le roy assurieus que par son humilité fut revoquee la sentence faicte par ledit ossuerius/ C’estassavoir que on devoit tuer en ung jour tous les juifz/ et elle qui estoit juifve ne vouloit pas et par sa grant humilité fut revoquee ceste sentence. Aussi nous avons de david que par son humilité subjuga tous ses ennemis et regna roy de jherusalem. Nous avons au contraire du roy nabuthgodonosor lequel par son grant orgueil fut mué en beste sept ans. Les poetes dient aussi que par le grant orgueil de narcisus il fut noyé dedans une fontaine. Nous avons veu en nostre temps de grans guerres lesquelles par orgueil se sont maintenues mais par humilité et traité de mariage les paix se sont faictes et a esté amour entre ceulx qui faisoient lesdites guerres. Plusieurs exemples se pourroient alleguer a ce propos/ mais souffice tant seulement pour le present. Par humilité plusieurs povres enfans qui n’avoient rien ne pere ne mere sont venus a grant perfection de biens et a grans honneurs et richesses et sont maintenant geune de bien. Aussi du contraire. Les autres qui souloient estre riches et venus de gens de bien et de grandes richesses qui par grant orgueil sont venus a grande povreté. Par grant orgueil aussi plusieurs se sont fait tuer et sont mors vilainement/ mais par humilité jamais homme ne fut deceu. Par humilité le serviteur devient maistre/ et par orgueil le maistre devient serviteur/ car nous lisons que orguel est la destruction de toutes choses. Par humilité nous povons acquerir l’amours de dieu. Et par orgueil enfer pardurable. Puis que ainsi est que par humilité tant de biens sont venus et vienent tous les jours. Je prie a chascun qui mette peine de estre humble affin que nous tous puissons acquerir & conquerre le chasteau d’amours qui est le royaulme de paradis. Auquel nous veuille recepvoir et conduire le pere/ le filz/ et le sainct esperit.