Il n'est chose tant soit secrete
Qu'a la parfin on ne la sache
Tousjours n'est pas femme discrete
De bien savoir couvrir sa tache
Quant l'un boute et l'autre sache
Savoir le fault de quelque part
Amours a sa guise despart
Amours
Helas m'amye ce n'est pas ce
Ne croyes pas cest ypocrite
Que feras tu de ta jennesse
Qu'est si belle et si bien escripte
La veulx tu perdre toute fritte
Sans faire ton loyal devoir
On peut maintesfoiz trop devoir
Honte
Devoir trop ou peu qui emprunte
Sur son honneur blasme ou reproche
Ja n'acquittera ceste emprunte
Celle qui soymesmes reproche
Plus s'esloigne et moyns s'aproche
D'estre par tout bien renommee
Jamais ne meurt la renommee
Amours
Dont vient renom fors que des preux
Dont viennent les preux que des dames
Par amours qui se sert entre eulx
Qui font esprouver ses heaulmes
Si que ung tout seul vault .x. royaulmes
Pour une a qui servant se clame
Prouesse double a cueur qui aime
Honte
Ma seur a jouer sans nul fatras
Seroit bonne amour et loyale
Mais apres le cop du matras
Au long aller n'est pas fiable
Car humanité cordiale
S'y fourre trop a l'aventure
A peine oublie on sa nature