Se nature se veult forfaire
Dame raison est par dessus
Pour la corriger et retraire
Affin qu'il n'en soit pas deceuz
Pource peut on et jus et sus
Qui resister veult si m'aist dieux
Raison domine soubz les cieulx
Honte
Qui seroit seur de la raison
On pourroit tout aventurer
Mais veoir bruler autruy maison
Fait pour la sienne procurer
Que feu n'y puisse pasturer
Et qu'elle ne soit desbastie
Sage par autruy se chastie
Amours
Chascun scet bien ce n'est pas bourde
Que pucelle qui n'a amy
Toute sa vie est sotte et lourde
Et ne scet ne bien ne demy
Et tousjours a l'ueil endormy
Sans peu de contenance avoir
C'est belle chose que savoir
Honte
Savoir pucelle sobrement
Doit sans vouloir estre suttile
C'est sa nature proprement
Ou faillir pourroit cop et quille
Tout ne vault pas une coquille
Quant de languager s'entremet
Qui trop parle mensonge y met
Amours
Trop de bien savoir ne peut on
Ne de mal mais que l'on n'en use
Qui riens ne scet c'est ung mouton
Une brebis ou une buse
Chascune foys on se rabuse
Quant on ne scet son entregent
Ung mot est bel quant il est gent