Que si tu veux emprunter
Des aisles pour y monter,
Je crains que la cire en fonde,
Et que, cherchant un bon heur,
En desastre et en malheur
Icare tu ne seconde.
SONNET DU MESME.
Archer ingenieux qui, par moyens rusez
Avez en tant de lieux percé mon cœur fragile,
Qui frappez seurement de la flesche subtile
Aussi tost que de l'œil le but où vous visez,
Faites, je vous supply, et si bien m'instruisez,
Que je puisse percer, par une adresse habile,
Ce Rocher endurcy, ce rocher qui à mile
Aprentis de voz ars a mille traits brisez.
J'ay tant de fois voulu à ce Roc faire breche,
Tant de fois decoché de mon arc une fleche,
Et tant de fois j'ay veu ma fleche reboucher.
Faudroit-il, je vous pri, pour luy donner entrée,
Qu'elle eut la pointe humide en lieu d'estre acerée,
Veu que la goute d'eau entame le Rocher?
