Ce n'est point par ma main que la sage pucelle
De Poictiers doit atteindre à l'immortalité:
Son sçavoir, sa vertu, ses meurs et sa beauté
La rendront à jamais de soy mesme immortelle.
E. Pasquier.
VŒU PASTORAL
EN FAVEUR DES POÈTES CHANTE-PUCES.
Celuy qui du Pascage emprunte le surnom,
Celle qui aux Rochers donne tant de renom,
Furent premiers motifs de cette Puce gaye.
Celuy qui à la Puce encor' a bonne part,
Et qui d'Amaryllis chante le sainct regard,
Trouva dans les forests le nom de la Couldraie.
Icy maint bon pasteur diversement voit on
Graver dans le sainct Roch sous l'a Bry son sainct nom;
Icy le bel Oysel degoiser son ramage,
Et le pastre Tourneur chanter mil beaux couplés,
Et tous abandonner la Deesse Palés
Pour faire à qui mieux mieux à une Puce hommage.
Icy voit-on le mont de Parnasse Escheler,
Icy le forgeron sainctement Marteler,
Icy pour, bien Biner, les riches fruicts renaistre
Au dessous des Chaux Pins, et le jeune berger,
Et Amboise des Dieux l'ambrosie Manger
Et du mielleux nectar souëfvement se paistre.
Vous qui hantez les Rochz, les pastiz, les forez,
Satyres chevrepieds et Faunes, quand orrez
De voz humbles pasteurs la devote musique,
Recevez dans vos monts, dans vos prés, dans vos bois,
D'un favorable accueil, leurs doux sonantes voix,
Mais gardez que comme eux la Puce ne vous picque.
E. Pasquier.