De la nef du cueur du portal
Ne sauroye au long toucher
Tous les murs estoient de cristal
Tous lambroussez jusques au clochier
De fin or et d'azur mout chier
Et la croisee toute d'ivire
Brief qui vouldroit tout espluchier
Il faudroit ung jour a le dire
Sy veis en entrant a l'eglise
Ung povre amant plourer sy fort
Portant le noir et sans devise
Comme tout plain de desconfort
Triste estoit lors jusques a la mort
Com s'il vouloit pencer de l'ame
Et disoit l'en leens qu'atort
L'on l'avoit bany de sa dame
Le gallant avoit pour habit
Longue robe noire dessainte
Comme pour estre a ung obit
Cornette de beau veloux tainte
En couleur de reffus et plainte
Cheveulx longs du temps des apostres
Et puis par devocion sainte
Portoit les belles patenostres
Quant je me fus agenoullé
Et que euz commencé ma priere
De cet homme me esmerveillé
Qui menoit sy piteuse chiere
Car a ung lieu n'arestoit guere
Ains alloit tousjours et venoit
Et sembloit bien a sa maniere
Que du monde ne luy challoit
En me pourmenant de travers
De la nef et a l'opposite
Ung des religieux convers
Vint donner a tous l'eau beniste
Puis que la grant messe fut dicte
Je veis la venir damp procureur
Portant ung visage d'ermite
Qui fist a l'amant grant honneur
Or ça dist il j'ay parlé
Au jour duy de vostre matiere
Mais damp prieur s'en est allé
Sy près il n'arrestera gueres
Je vous asseure qui n'y a frere
Ceans qui ne vous aime bien
Pour quoy devés faire grant chiere
Car vostre besongne ira bien
Lors dist l'amant la leur mercy
De mon cas sont mal informés
Las je n'ay fait ailleurs ne sy
Chose dont doye d'eux estre amez
Mes biens fais sy sont clers semez
De moy ne leur en doibt challoir
Quant les auroy acoustumés
Je n'emporray que mieulx valloir
Tantost après cy arriva
Damp prieur venant de dehors
Auquel damp procureur luy va
Presenter le povre amant lors
Disant pere misericors
En vecy ung qui fain a de rendre
A l'ordre le cueur et le corps
Se c'est vostre gré de le prendre
Premierement il fault sçavoir
Dist damp prieur sa voulenté
Et s'il pourra bien recepvoir
Tant de tourment et de durté
Il n'y a leans que povreté
Amy je le vous vueil bien dire
Affin que sy y estes bouté
Vous prenés en gré le martire