Helas dist il ne m'en chault
Eslire vueil la voye certaine
J'ay essayé du froit et du chault
Et sçay que ceste vie mondaine
Est fainte deceptive et vaine
Faisans cent mille gens perir
Qui plus y est plus a de peine
Et sy fault une foys mourir
Damp prieur
Or ça mon amy qui vous meult
Dont vous vient ceste affection
L'ennemy tressouvent esmeut
Maintes gens par temptacion
Soubz umbre de devocion
Pour faire ung coup a l'aventure
Et entrer en profection
Dont après ilz maudissent l'eure
L'amant
A par ma foy je vous diray
La chose ne m'est pas subite
Car j'ay pieça deliberé
De mourir reclus ou hermite
Les biens d'amours je les vous quicte
Mes ris sont tournés a plourer
En lieu ou tout plaisir habite
Je ne quiers jamais demourer
Damp prieur
Comment vous qui estez sy jeune
Avés vous le cueur tant failly
Qui ne vous chault de vie mondaine
Hault desir est il aboly
Avés vous regart a nulluy
Vous a l'en rien dit ou meffait
Amours vous ont il defailly
Qui ceste maladie vous fait
L'amant
Ma maladie la ne gist point
Ne n'ay regret a homme ne a femme
Remors de conscience me point
Seulement a pencer de l'ame
Car a poursuir grace de dame
Trop y fault de pas et de tours
Et sy n'en puet on avoir dragme
Qui ne couste mille douleurs