Telles douleurs ne sont que joye
A gens qui les scevent contendre
Et viennent de la la mont joye
D'onneur qu'on ne sauroit comprendre
Biens d'amours ne se pevent trop vendre
Car c'est en tout temps heritaige
Qu'on ne peut perdre ne despendre
Et sy rend tousjours davantaige
L'amant
Le dire ne vous couste gueres
Je sçay bien comment il m'en tient
De tant que ma plaisance est chiere
Voirement plus peine apartient
Mais quant tousjours on la soustient
En vivant soubz une esperance
D'aquerir loier qu'on retient
C'est la pour perdre pascience
Damp prieur
Dames ne sont point tant cruelles
Ne sy despourveues de savoir
Que de ceulx qui seuffrent pour elles
Elles n'en facent leur devoir
Mais sy n'y veulent pourvoir
L'on ne les en doibt point blasmer
Legier croire fait decevoir
Il fault congnoistre avant que amer
L'amant
Que peut on mieulx homme congnoistre
Que par service et diligence
Quant on le voit nuyt et jour estre
Atendant d'amours l'influence
Muer couleur et contenance
Suer trembler et soupirer
Helas c'est bien l'experience
Qui la vouldroit considerer
Damp prieur
De telz maulz nulz n'est tant malade
Qu'on ne face bien tost guerir
D'un baiser ou d'une balade
Quant amour le veult secourir
Tel se plaint avant que ferir
Qui n'a douleur ne maladie
Ne n'en voit l'en gueres mourir
Quelque chose que n'en me die