Ha monseigneur vous avés tort
Vous sçavés mieulx que vous ne dictez
Car plus vauldroit souffrir la mort
Que telles douleurs etroclites
Se sont angoisses cy despites
Qui font le sens perdre et tourner
Aumoins ceulx la en seront quictes
Ne n'y faudroit plus retourner
Damp prieur
Or je vous demande beau sire
Se la dame ou estoies submis
Vous a brassé sy dure martire
Que secours n'y puisse estre mis
y avoit il nulz compromis
Entre vous deux et alliance
Ou celle avoit nulz autres amys
Qui vous aient fait bailler l'avance
L'amant
Doubter point ne fault de cela
Tant estoit parfaicte et entiere
Pour ce maintenir ça et la
Fust en langaige et en maniere
D'onneur estoit la tresoriere
Belle et bonne sans quelque chose
A chascun faisoit bonne chiere
Mais ne m'y demandés autre chose
Damp prieur
De dire que n'y trouvés point
Ung peu plus qu'autre d'avantaige
Je ne puis concevoir ce point
Ne qu'elle eust sy gros couraige
De vous veoir endurer dommaige
En la servant et pour bien faire
Veu qu'elle estoit sy bonne et sage
Aussy je ne le sauroye croire
L'amant
Le bien et le mal congnoissoit
Jamais n'en sera de pareille
Dieu luy doint bon jour ou qu'elle soit
Et a tous ceulx de sa sequelle
Quant j'oys encor parler d'elle
Les larmes m'en viennent es yeux
Et ma doleur s'en renouvelle
Dont il ne m'en est pas de mieulx