Elle et aultre fault oublier
Folie est de s'y amordre
Aumoins se vous y voulés lier
Et garder les veux de nostre ordre
Du temps passé vous faudroit tordre
Les mains et avoir repentailles
Sy notés bien ces motz par ordre
Car se n'est pas jeu de troys mailles
L'amant
Helas c'estoit la plus prudente
Que je veis onc et plus parfaicte
Saige savant d'onneur plaisante
En bonté et beauté complecte
De tous biens brief estoit replecte
Il n'y falloit metre n'oster
Quant il m'en souvient je souhaite
La mort que me viengne emporter
Damp prieur
En ung propos n'estes pas ferme
En ce que puis apercevoir
Ne n'est pas le chemin de l'ame
De vos amours ramentevoir
Il vous en fault tout demouvoir
Et ung autre leçon aprendre
Avant qu'on vous puist recevoir
En la religion ne prendre
L'amant
Si forte rigle que vouldrés
Bien garderé pour abriger
Et me sembloit que quant saurés
Qui me fait mon mal rengregier
Vous aiderés a deschargier
Mon povre cueur de grant mesaise
Mais j'ay paour de vous trop charger
Et que mon langaige desplaise
Damp prieur
Nenny vous serés escouté
Dire me povés hardiment
Cy soubz le benedicité
Vostre vouloir et pensement
Aussy avons exprès serment
De ne prendre ceans personne
S'il ne desclere entierement
La cause pour quoy il s'i donne