Vray est que fu jadis esprins
Par le mouvement de desir
De ceste dame de hault pris
Se s'eust esté son bon plaisir
Ou failly n'avoye a choisir
De en sa grace me hebergier
Mais dangier m'en vint dessaisir
Qui me fist bien tost deslogier
Damp prieur
Dangier sy a ceste coustume
D'effroier tousjours la poulaille
Il destaint le feu et l'alume
Il trenche les morceaux et baille
L'un rançonne l'autre tenaille
Il en prent par ou il en treuve
On n'a point telz biens sans bataille
Mais il ne fault pas qu'on recouvre
L'amant
Las je ne sçay quel recouvrer
Il vault mieux plus tost departir
Que trop attendre et pis trouver
Et retraire que repentir
Brief c'est pour devenir martir
Qui a entre ses mains affaire
Car quant on cuide bien departir
Lors c'est quant est a reffaire
Damp prieur
De dangier ne se doibt l'en plaindre
Car amour sy l'a destiné
Pour reprouver et pour refraindre
Le feu de desir obstiné
Bien aux dames fut ordonné
Pour en avoir la garde et umbre
Car tout seroit habandonné
Et en vendroit des maulx sans nombre
L'amant
Non feroit ja sans vostre grace
Dames ne sont point sy volaiges
Que cy tost et de prime face
Pour ung peu de plaisant langaige
Elles declerent leur couraige
Sans savoir a qui ne comment
Aussy raison qui est leur gaige
Ne le souffreoit aucunement