Raison est souvent endormie
Mais jamais dangier ne sommeille
Ne ne dort heure ne demie
Tousjours a la puce en l'oreille
Il court il suyt il traveille
Pour guerroier jeunes et vieux
Il est bon mestier qu'on y veille
On ne demanderoit pas mieulx
L'amant
Puis male bouche et faulx parlant
M'ont grevé tant qu'on seroit dire
Sans ce que j'en aye fait semblant
Cuidant qui se deussent reduire
Ou apaiser ung peu leur yre
Mais plus y pert qui plus leur donne
Car elles m'en ont voulu plus nuyre
Mais maintenant je leur pardonne
Damp prieur
C'est bien dit nous devons benistre
ceulx mesmes qui nous font les motz
Et avons expresse epistre
Se me semble ad corintheos
Se vous estes misericors
Dist dieu je le vous seray
Combien que de tous durs effors
Ne sembloit pas tout empiray
L'amant
Je n'ay membre qui ne s'en sente
Il m'en puet assez souvenir
Et tel souvent cy rit et chante
qui est dolent jusqu'au finir
Je m'en sçay bien a quoy tenir
Et sy n'y puis secours donner
Ains m'en fault des maulx soustenir
Dont ne fais pas les sains sonner
Damp prieur
Quant vous enduriés telle peine
Que n'alliés vous devers la belle
Dire vostre raige inhumaine
Et impetrer la grace d'elle
Je crois qu'eussiés eu nouvelle
Opportune pour vous guerir
Car dame n'est point sy cruelle
Que nul vueille faire mourir