PINDARE.
Qui reviendra bien-tost calmera cét orage.
CASSIE.
Je l'ay precipité dans l'excez du danger,
Mais bien-tost par ma mort il se verra venger.
Sus donc, ne tardez plus, contentez mon envie,
Vous me tuez cent fois en me donnant la vie.
Quoy, vous baissez les yeux, mouvemens imparfaits,
Demetrie, Pindare, où sont donc mes bien-faits?
Je vous ay rendus francs, & vostre ingratitude
Me veut laisser croupir dedans la servitude,
Insensibles, cruels, pour estre malheureux,
Ne suis-je plus en droit de dire je le veux?
PINDARE.
Devoirs, faveurs, bien-faits, liberté redonnée,
Venez vous presenter à mon ame obstinée;
Chassez ces mouvemens de tendresse & d'amour,
Et que l'obeïssance y domine à son tour.
Mes voeux sont exaucez, cher Maistre je vous cede,
Et puis que vostre bien depend de ce remede;
Quoy que ce lache coeur y souffre du combat,
Je veux estre meurtrier pour n'estre pas ingrat:
Mais si dans vostre esprit la pitié trouve place,
Jusques apres cela ce qu'il faut que je face,
Et de combien de morts pour une seule mort
Cét acte me prepare à ressentir l'effort,
Faire mourir celuy de qui je tiens la vie,
Qui seul peut affranchir nostre Rome asservie,
Que je perde celuy que la faveur de Mars
A mille fois sauvé du milieu des hazards:
Et bref qu'en un moment je defasse un ouvrage,
Que des siecles ont fait pour honorer nostre âge,
Mon Maistre, mon Seigneur, seul apuy du païs,
Ha! que je suis brutal si je vous obeïs.
CASSIE.
Tous ces foibles discours offensent mon courage,
Icy l'amour me nuit, & la pitié m'outrage,
Si toutefois on peut donner des noms si saints
Au profane mespris qui choque mes desseins,
Pindare tu me hais en m'aymant de la sorte,
Je ne sçaurois survivre à la liberté morte:
Ouvre moy l'estomach, mais tu jettes ce fer
Qui me devroit ouvrir la porte de l'Enfer,
Peut-estre que ta lame aux ennemis fatale
Frapant contre un amy, craint d'estre desloyale;
Si c'en est le sujet, pousse la hardiment,
Tu m'as fait ennemy par ton retardement:
Mais pour ne pas troubler son visage ordinaire,
Tien, voicy ce poignard qui t'offre de le faire,
Aussi depuis long-temps choisi pour ce dessein,
Il en seroit jaloux s'il ne m'ouvroit le sein.
DEMETRIE.
Puis-je voir achever un acte si barbare?