Il est bien voirs que li evesques de Lincolle esploita tant par ses journées qu’il vint à Bervich, où il fu liement recheus de monseigneur Edouwart de Bailloeil, qui en estoit cappittainne. Là sejourna li evesques tant que ungs hiraux d’Engleterre eut estet en Escoce querre ung sauf conduit au roy qui se tenait en Haindebourcq, pour le dit evesque et toutte se mesnie: si ques sus le sauf conduit li evesquez se parti et s’en vint devers le roy David et les barons et seigneurs d’Escoce. Il fu volentiers oys de tout ce qu’il leur remoustra, et li respondirent qu’il en aroient avis. Si fu la responsce telle et faite d’un baron d’Escoche, messire Archebaux Douglas, et dist: «Sire, li rois mon seigneur et tous ses conssaux ont bien oy ce que vous requerés. C’est li entension dou roy nostre seigneur et de ses hommez, que nul respit vous n’enporterez ne arrés; car nous sommes tout pourveu de gueriier sus le roy d’Engleterre et sus son pays, et de contrevengier les despis et dammaiges qu’il nous a fais.» Et quant li evesques de Lincolle entendi che, si fu tous courouchiéz et se repenti moult, quant onequez y avoit entré pour faire messaige. Si se parti adonc des Escos sans congiet et sans amour, et s’en revint au plus tost qu’il peult en Engleterre et trouva le roy à Londrez et une partie de son consseil à qui il fist relation de son messaige. Et quant li roys l’eut oy, si fu durement courouchiés et dist bien que, tout maugré lui et son consseil, on li avoit envoiiet, et que jammais cilx blasmes ne lui seroit absolz. Tant estoit li roys yreux que à painnes le pooit on appaisier, et dist que jammès n’aresteroit, si aroit si menet les Escos et si destruit leur pays, que jammais ne seroit recouvret, en quel aventure qu’il dewist mettre che qui dechà le mer estoit. Si envoiia tantost as pors et as havenes de mer coummander que on ne laiaist nullui passer jusques à tant que on oroit autres nouvellez. Et fu par ensi detriiés li voiaiges de monseigneur Robert d’Artois et de la comtesse de Montfort qui en grant destrèce de coer estoit de ces avenues. Ossi chil qui devoient aller en Gascoingne furent contremandet. Et fist li roys ung especial mandement et coumandement à estre touttez mannierres de gens portant armes, à Ewruich, le jour de le Pasque ou trois jours apriès; et qui en deffauroit, il perderoit sa terre, le royaume d’Engleterre et l’amour dou roy. Fº 74.

P. [6], l. 17: Ewruich.—Mss. A 1 à 6: Bervich. Fº 101 vº.

§ 184. P. [6], l. 21: Li jours.—Ms. d’Amiens: A che especial mandement que li roys fist, ne s’osa nulz escuser ne delaiier qu’il ne fust, et vinrent de tous lés d’Engleterre à Ewruic, et furent là en Paskèrez; meysmes la comtesse de Montfort, qui poursuivoit sa besoingne, y vint avoecq monseigneur Robert d’Artois. Tant avoit li roys englès là de gens, qu’il estoient bien cent mil, c’à piet, c’à cheval; et tantost le jour de le Pasque passet, il se parti de Ewruich et prist le chemin dou Noef Castiel sur Tin. Or entendirent li Escot que li roys englès venoit sur yaus si efforchiement que toutte se puissance y estoit avoecq lui, et en vollenté que de toutte destruire et ardoir Escoce sans merchy. Si en furent, je vous di, li plus dou pays d’Escoce tout effraé, car il sentoient leur pays et leur besoingnes auques en bon estat, et point ne se veoient fort contre le puissanche dou roy englès. Si se missent ensemble chil dou pais, prelas, comtez, barons, chevalier et riche homme dez bonnez villez, et vous dit qu’il y eut là mainte parolle retournée. Li aucun volloient le guerre, li autre le respit; et li pluisseur amaissent mieux le pais, se elle pewist estre. Si tenoient ossi li sage homme dou pays le roy à outrageusement consilliet, quant telle responsce on avoit fait à l’evesque de Lincolle, et que fort estoit se à ceste venue et assamblée dou roy englèz trop cher ne le comparaient. Cez parolles dessus dittez en plain parlement, present le roy et le grant consseil, messires Guillaumme de Douglas, messires Jacquemes de Douglas, ses onclez, messires Archebaux de Douglas, ses cousins, et tout chil de ce sanch les reputoient à grant ynoranche et à grant faintisse. Et disoient bien que c’estoient cil d’Escoche qui le plus à perdre avoient aprièz le roy; mes pour aperdre villez et castiaux et tout leur hiretaige, jà ne seroient en lieu ne en consseil où li oppinion de le première responsce dessus faitte fuist brisie ne amoliie, car trop leur retouroit à grant blamme et à vilain prejudisse à tous jours mès.

A che parlement y eut pluisseurs grosses parolles des uns as autres, car chil de Douglas y estoient si grant et si cremut, et tant avoient fait de biaux servicez au royaumme d’Escoche, que touttes mannierrez de gens les en amoient, et meysmement li roys y ajoustoit grant foy et grant sceurté. Nonpourquant il congnut assés que li aucun s’astenoient assés de voir à dire pour le doubtanche des dessus diz. Si emprist le parole de fait et dist: «Je sui, par le grasce de Dieu, roi d’Escoche, et le tieng en hiretaige par le sucession monseigneur Robert de Brus, de bonne memore, mon chier père, qui vaillanment et poissanment le tint et deffendi, tant qu’il vesqui, contre les Englèz. Depuis nous ont il fais moult de dammaiges, lesquelx j’amenderoie vollentiers, se je pooie. Or sommes nous emfourmet qu’il viennent très puissamment sour nous. Si vous pri et carge en especial que vous me conssilliéz tellement que ce soit à l’onneur de my et au commun prouffit de mon royaumme, et que nuls n’y regarde grandeur, orgoeil, ne linage. Et se vous sentés que nous soyons puissant pour combattre les Englèz, se le dittes, et nous metons tout au devant à l’entrée de nos pays.» Dont en y eut aucuns qui baissièrent les testez, et li aucun qui se veurent acquitter, respondirent: «Sire, nenil, et ewissiens encorrez otant de gens que nous avons.»—«Or coumande jou, dist li roys, puisque combattre ne nous poons et que nous n’en sommes point d’acort, que ceste besoingne soit dou tout cargie sur moy, sur le comte de Moret, sus l’evesque de Saint Andrieu et sur l’evesque d’Abredane.» Adonc tous li coummuns conssaux respondi: «Sire, vous dittes bien.»

Ensi se departi chils parlemens, non que li roys d’Escoche donnast congiet à ses gens, mès remforça son mandement de tous lés; car il ne savoit mies coumment li tretiéz se porteroit entre lui et le roy englèz. Conssaus entre ces quatre dessus noummés se porta que li doy evesque, c’est assavoir chilz de Saint Andrieu et chilz d’Abredane, se partirent d’Aindebourch, fondé et enfourmé quel cose il devoient dire et faire, et vinrent sus sauf conduit deviers le roy d’Engleterre à Durem, là où il se tenoit et attendoit ses os, et jà en y avoit grant fuison au Noef Castiel sur Tin. Quant li doy evesque d’Escoce dessus noummet furent devant le roy englès et aucun de son consseil, telz que le comte de Lancastre, le comte Derbi, monseigneur Robert d’Artois, le comte de Warvich, le comte de Sallebrin, le comte de Norrenthon et de Clocestre, monseigneur Richart de Stanfort, le seigneur de Biaucamp et messire Renaut de Gobehen, ils enclinèrent le roy et tous les seigneurs par mannierre de reverensce et dissent: «Sire, roys d’Engleterre, nous sommes deviers vous envoiiet de par le roy d’Escoce, nostre seigneur, et tout son consseil. On leur a dounnet à entendre que vous estez moult esmeut de gueriier Escoce, enssi que vous avés fait autrefoix; et bien est appairant ossi que la responsce que li evesquez de Lincole vous fist, ne vous est mies bien agreable. Sachiés, sire, que à ce jour que li evesques fu deviers nostre roy ou nom de vous, li rois, nos sirez, avoit envoiiet en Franche deviers le roy Phelippe, pour ce que certainnes convenences et alianches sont entre lui et le roy de Franche. Et ne puet li roys nostre sirez, dounner, prendre, requerre, demander ne accepter trieuwe ne respit enviers vous, sans le sceu dou roy de France. En che s’est il obligiez et acouvenenchiéz par sierment de roy solempnement juret et saielet. Or sont depuis li messaiges qui en Franche avoient estet envoiiet, retournet, et puet nos sirez, par le congiet dou roy de Franche, donner, accorder et accepter trieuwez et respit jusques à un certain terme durant, dont il n’est nus besoings de chy dire; mès nous sommes fort de par nostre roy et tout son consseil de prendre et de dounner une trieuwe ung an ou deux, s’acors le porte, et de che il vous en plaise à nous respondre.»

Quant li roys englès eut oys les deux evesquez d’Escoce ensi parler, si leur dist qu’il en responderoit vollentiers à l’endemain. Ceste responsce leur souffi assés bien. Dont se conssilla li roys tout ce jour quel cose en estoit bon affaire. Il voloit briefment, c’estoit tous ses desirs, chevauchier avant sus Escoce, ou cas qu’il avoit ses gens semons et assembléz en ceste instance. Touttez foix finablement ses conssaux regarda et conssidera les besoingnes qu’il avoit affaire en Franche, en Bretaingne et en Gascoingne, et que ceste guerre as Escos leur estoit trop coustable et perilleuse à nul prouffit; car s’il avoient tout ce que li royaummes d’Escoce puet finer, il n’aroient mies le chevanche d’un droit si grant. Bien y pooient mettre et peu prendre. Si consillièrent au roy que il presist une bonne et ferme trieuwe à durer trois ans, puisqu’il l’en requeroient, et que c’estoit grandement à sen honneur. Tant fu li roys conssilliéz d’uns et d’autres que finablement une trieuwe fu acordée entre lez Englès et les Escos, et devoit durer de ce jour jusques à le Saint Jehan Baptiste, c’on compteroit l’an mil trois cens et quarante trois, et de là en troix ans, et devoit chacuns tenir che qu’il tenoit. Et pooient chevalier et escuier d’Escoce prendre les gages au roy englèz, s’il leur plaisoit. Moult fu la comtesse de Monfort resjoïe de ceste trieuwe, car par lez Escos avoient jà estet ses besoingnes arrierées.

Ensi se departi ceste grande chevauchie. Et coumanda li roys au seigneur de Fil Wautier, à monseigneur Jehan Camdos, au seigneur de Multonne, au seigneur de Pont Cardon et à chiaux qui en Gascoingne devoient aller, qu’il presissent leur carge de gens d’armes et d’archiers et fesissent leur voiage. Dont s’appareillièrent li dessus noummet signeur et vinrent au port de Hantonne, et ordonnèrent là leur besoingne, et se missent en mer et singlèrent deviers Gascoingne.

Or dirons de le comtesse de Montfort qui si bien exploita au roy englès que li roys pria à monsigneur Robert d’Artois, au comte de Sallebrin, au comte de Sufforch, au comte de Pennebrucq, au comte de Kenfort et au baron de Stanfort et as pluisseurs autres, que il volsissent prendre en cure lez besoingnes de le ditte comtesse, et yaux partir hasteement d’Engleterre et venir en Bretaingne, et gueriier tellement qu’il y ewissent honneur et la dame prouffit; et chil signeur li eurent tout en couvent. Si se partirent dou roy et vinrent en Cornuaille, et pourveyrent là leur navie pour venir en Bretagne. Si estoient bien mil hommes d’armes et deux mil archiers et otant de chevaux. De touttez ces gens estoit messires Robiers d’Artois chiés.

En che tamps escheirent les Pasquez si haut que environ Closes Pasques eut on l’entrée dou mois de may, de quoy en le moyenné de ce mois la trieuwe de monseigneur Carle de Blois et la comtesse de Montfort devoit fallir. Or avoit la chevauchie d’Escoce si detriié la besoingne de la dessus dite comtesse que la trieuwe estoit jà close, quant elle se parti d’Engleterre. Si estoit bien messires Carlez de Blois enfourmés dou pourcach que elle faisoit en Engleterre et de l’ayde que ly roys englès ly devoit faire. Dont messires Loeys d’Espaingne, messire Carlez Grimaus et messires Othon Doriie estoient estaubli sus le mer à l’encontre de Grenesie, à trois mil Geneuois et à mil hommez d’armes et seize gros vaissiaux espagnolz, tous armés et tous fretéz, et waucroient sus le mer, attendans leur revenue. D’autre part, messires Ghautiers de Mauni et li signeur de Bretaigne et d’Engleterre qui dedens Hainbon se tenoient, estoient durement esmervilliet de leur comtesse de ce que elle demoroit tant, et si n’en ooient nullez certainnez nouvellez. Nonpourquant, mout bien supposoient que elle ne demoroit mies trop à se grant aise, et ne se doubtoient d’autre cose que elle n’ewist eu aucun villain encontre sus mer de ses ennemis: se ne savoient que pensser. Fos 74 vº et 75.

—Ms. de Rome: Mesires Carles de Blois fu enfourmés de verité que son adversaire, la contesse de Montfort, estoit alée en Engleterre au seqours, et i avoit mené ses enfans pour là demorer dalés le roi. Si pensa sus li dis messires Carles moult longement, et puis apella son cousin mesire Lois d’Espagne, ouquel ils avoit moult grant fiance, et li dist: «Biaus cousins, ce seroit bon, se vous l’acordiés, que une armée de gens d’armes de Geneuois et d’Espagnols fust mise sus en la mer, et là waucrast, en attendant le retour et la revenue de celle contesse de Montfort qui est alée en Engleterre. Se nous le poions atraper, nostre gerre en seroit plus belle.» A ce pourpos respondi li dis messires Lois et dist: «Vous dites verité, et il en sera ce que vous vodrés, car je sui tous près à faire vostre plaisir.»—«Grant merchis,» respondi messires Carles. Depuis ne demora gaires de temps que mesires Lois d’Espagne, qui bien savoit les usages et coustumes de la mer, se pourvei de barges et de balengiers, et mist sus la mer son armée, où bien avoit deus mille honmes parmi les Geneuois et les Espagnols, et disoit que ceuls de sa partie n’avoient donné nulles trieuves sus mer, fors que sus terre. Qant la contesse de Montfort ot ordonné toutes ses besoingnes en Engleterre, et elle sceut quels gens elle aueroit, cinq cens honmes d’armes et cinq cens archiers, et les devoient conduire messire Robers d’Artois et li contes de Pennebruq, en lor compagnie devoient estre li jones sires Espensiers, messires Edouwars, mesires Guis de Briane, mesires Thomas de Walquefare, li sires de Tallebot, li sires de Boursier, mesires Robers de Noefville, messires Jehans Paule, mesires Lois Clifort, mesires Guillaume Chifeton, mesire Richart de Pont Cardon et pluisseur aultre, et se ordonnèrent et atendirent tout l’un l’autre à Pleumude.