Assés tost apriès, se fist uns assaux devant Vennes moult grans et moult fiers, et assaillirent le chité chil qui assegiet l’avoient en troix lieux et toutte à une fois, et trop donnèrent affaire à chiaux de dedens; car li archier d’Engleterre traioient si ouniement et si espessement, c’a painnes s’osoient chil qui deffendoient, amoustrer as gharitez. Et dura chilz assaux ung jour tout entier. Si y eut moult de bleciéz et de navréz d’un lés et de l’autre. Quant che vint sus le soir, li Englès se retrayrent à leurs logeis, et chil de dedens à leurs hostelz, tous lassés et moult travilliés. Si se desarmèrent, mès chil de l’ost ne fissent mies enssi, ainchois se tinrent en leurs armeurez et ostèrent tant seullement leurs bachinés, et burent ung cop chacuns et se rafresquirent. Depuis, par l’avis et consseil monseigneur Robert d’Artois, qui fu ungs grans et sages gueriièrez, il s’ordonnèrent en trois batailles, et en envoiièrent les deux à deux portez là où il faisoit le plus fort assaillir, et le tierche fissent tenir toutte quoye couvertement. Et ordonnèrent que si trestost que li autre aroient assailli une bonne espasse, et que chil de dedens entenderoient à yaux deffendre, il se trairoient avant sus ce plus foible lés et seroient tout pourveu d’escielles cordées à grawès de fier, pour jetter sus les dis murs et atachier as gharitez, et asaieroient se ceste voie le poroient concquerre.
Tout ensi comme il eurent ordonnet et estaubli, il fissent. Et s’en vint messires Robers d’Artois en le première bataille assaillir et escarmuchier à le baille de le porte, et li comtez de Sallebrin enssi à l’autre. Et pour ce qu’il faisoit tart, et affin ossi que chil de dedens en fuissent plus esbahis, il alumèrent grans feux, si ques li clartés en resplendissoit dedens le chité. Adonc tout à une vois li homme de le ville qui virent le feu et le lumierre, et especialment cil dou castiel, quidèrent que leurs maisons ardissent. Si criièrent: «Trahy! trahy! armés vous! armés vous!» Jà estoient li pluiseur couchiet et retret pour yaux reposer. Si se levèrent soudainement et s’en vinrent, sans arroy et sans ordonnanche et sans parler à leur cappitainnes, celle part où li feux estoit; et ossi li seigneur qui en les hostelx estoient, s’armoient. Entroes que ensi il estoient entoueilliet et empeschiet, li comtez de Kenfort et messires Gautiers de Mauni et leur routte, qui estoient ordené pour l’esciellement, entendirent à faire leur emprise et vinrent de ce costet où nus n’entendoit, et drechièrent leurs eschiellez et montèrent amont, les targes sus lor testez, et entrèrent en le cité par celle mannierre assés paisivlement. Et ne s’en donnèrent garde li Franchois et li Breton qui dedens estoient. Si virent leurs ennemis sus le rue et yaux assaillir devant et derière: dont n’y eut si hardi, qui ne fuist tous esbahis, et tournèrent en fuitez chacuns pour lui sauver, et quidièrent que li meschiés fuist plus grans que il n’estoit; car, se il se fuissent retourné et deffendu de bonne vollenté, il ewissent bien mis hors les Englès qui entrés dedens estoient. Et furent li seigneur qui cappittainne en estoient, si souspris, que à painnes peurent il monter à ceval, et quidièrent y estre tout trahi. Et s’en parti tout premiers pour son corps sauver messires Oliviers de Clichon, et fist ouvrir une porte et prist les camps. Ossi tout li seigneur qui dedens estoient, se sauvèrent, chacuns qui mieux peut.
Là eut, je vous di, grant encauch, grant noise, grant occision d’ommes, de femmez et d’enfans, car cil qui escellé l’avoient, vinrent as portes et coppèrent les flayaux, et ouvrirent lez portes et puis lez baillez. Si entrèrent ens touttes mannierrez de gens, premiers messires Robers d’Artois et se bannierre et toutte se routte, messires Richart de Stamfort et se bannierre, li comtez de Pennebrucq et se bannierre, et ensi tout li autre chevalier et escuier, qui mieux mieux. Et chil de Vennes widoient et fuioient leurs maisons, et laissoient femmes et enffans, draps et jeuiaux. Et vous di que, se che ewist estet de jour ossi bien que ce fu de nuit, tout chevalier et escuier et autres bonnez gens de Vennes ewissent estet tout mort et pris. Mès li Englès ne chachièrent point, car pas ne congnissoient lez usaiges ne les voies d’environ le chité, et si leur sambla qu’il ewissent trop bien exploitiet, quant il avoient pris le ville et le chité de Vennes par assault et boutté hors leurs ennemis. Fº 76.
—Ms. de Rome: Droit as octaves de la Saint Jehan Baptiste s’en vinrent la contesse de Montfort, messires Robers d’Artois, messires Gautiers de Mauni et li chevalier de Bretagne et d’Engleterre mettre le siège devant la chité de Vennes, et l’environnèrent si avant que assegier le porent, car bien estoient gens pour ce faire. Cil de la chité se confioient grandement en la bonne chevalerie qui dedens estoient, et à bonne cause; car c’estoient tous vaillans honmes et de grant prudense. Euls venu devant Vennes, il i fissent pluisseurs assaus as portes et as barrières. Et moult vaillanment asalloient li Englois; et aussi li chevalier et li esquier qui dedens estoient, par grande apertise d’armes se deffendoient.
Mesires Carles de Blois mettoit grande entente à ce conment il peuist avoir tant de gens d’armes et de Geneuois que il peuist lever le siège, et resister contre la poissance de la contesse, et avoit ses messages alans et cevauçans en France nuit et jour deviers le roi Phelippe et les signeurs. Mais pour lors la cours dou roi de France estoit si raemplie d’uiseuses et si lontainne en esplois, que à painnes pooit on avoir nulle delivrance, ne on ne pooit avenir jusques au roi, car tous jours estoit il en ses deduis. Et jà se tenoient li tresorier de France tout hodé et moult acargiet dou fait de la guerre de Bretagne, car trop d’or et d’argent, à ce que il faisoient entendant au roi et à son consel, reversoient là.
Dou conmencement de ces gerres de Bretagne, li rois Phelippes de grant volonté aida son cousin à continuer la gerre et à lui envoiier gens d’armes et saudoiiers. Et puis que les gerres furent escaufées, et que les Englois s’en ensonniièrent, il s’en refroida, à ce que on vei les apparans, dont les besongnes en furent plus laides pour messire Carle de Blois.
Or retournons au siège de Vennes. Messires Robers d’Artois et messires Gautiers de Mauni rendoient grant painne à ce que il peuissent conquerir la chité de Vennes, pour faire garnison et frontière contre le demorant dou pais. Bien savoient que par trettié jamès ne le raueroient, car elle estoit garnie et pourveue de vaillans honmes et grans signeurs de Bretagne et bien amis à mesire Carle de Blois, qui jamais n’entenderoient à nul trettiet. Et lor estoit avis que, se il poient avoir Vennes et conquerir, il seroient grant signeur sus la frontière, car il aueroient Vennes, Hainbon et Brest, et tout seant sus la mer. Et poroient ces trois garnisons sans dangier conforter l’un l’autre et retraire au besoing, se poissance de gens d’armes lor croissoit dou roiaume de France. Pour ce soutilloient il nuit et jour conment il le poroient avoir, et tant i visèrent et soutillièrent que il vinrent à lor entente.
Entre les asaus que les Englois et les Bretons fissent à la chité de Vennes, il en i ot un grant et bien continué, car il dura un jour tout entier, et se ensonniièrent priès toutes les gens d’armes de l’oost et chil de dedens. Qant ce vint sus le soir, tout se retraiièrent dedens et dehors à lors logeis. Messires Robers d’Artois et les Englois et Bretons d’un lés soupèrent bien briefment, et point ne se desarmèrent, et reposèrent un petit. Et tantos apriès mie nuit, il sallirent sus, sans faire grant noise, et s’ordonnèrent en pluisseurs routes, et s’en vinrent pour assallir Vennes. Et fissent alumer grant fuisson de feus de busce au plus hault de la ville au dehors et au desus dou vent, et dou plus priès de la ville que il porent.
Chil qui faisoient le gait pour la nuit dedens Vennes, veirent les feus eslever contre mont à celle heure là. Si furent tout esmervilliet, et quidièrent de premiers que li feus fust en la ville. Si vinrent celle part; si conmenchièrent à faire grant noise et à resvillier ceuls qui dormoient. Chevalier et esquier sallirent sus apertement, et quidoient que la ville fust prise. Et ensi que il issoient hors de lors hostels, et il veoient les feus et les fumières au dehors, il quidoient que ce fuissent les maisons de Vennes qui ardissent, et estoient tout esfraé. A celle heure i avoit très grant assaut à deus portes de Vennes; et pour ce que li hus et li cris estoient là, toutes gens d’armes s’i traioient.
D’autre part, mesires Robers d’Artois, mesires Gautiers de Mauni et une bataille d’Englois et de Bretons estoient aviset de lor fait et pourveu d’escelles de cordes, et alèrent tout à l’oposite de l’asaut et dou hustin, là où nuls n’estoit ne n’entendoit. Et jettèrent lors escelles à cros de fier, et les atachièrent as murs, et puis montèrent amont, sans estre oï, sceu ne veu, car li aultre menoient si très grant hustin, qui asalloient et qui se deffendoient, que on n’ooit de nulle part goute pour euls. Par celle manière entrèrent en la chité de Vennes plus de deus cens honmes d’armes, mesires Robers d’Artois et sa banière et li sirez Espensiers et sa banière, li sires de Fil Watier et son pennon, mesires Gautiers de Mauni et son pennon, et fu chils qui tous premiers i entra. Et qant il furent tout dedens, il se missent en bonne ordenance et arroi, et descendirent tout parmi une rue, en escriant lors cris, et en abatant tous ceuls que il encontroient. Li François estoient et furent soudainnement si effraé et en tel desroi que il conmencièrent à fuir, li uns chà et li aultres là, sans mettre nulle deffense en euls. Toutes fois, li sires de Cliçon, mesires Hervis de Lion, mesires Guis de Lohiac et li chevalier qui en garnison là dedens estoient, se sauvèrent et montèrent sus lors chevaus et laissièrent tout lor arroi. Onques riens n’enportèrent, et quidièrent bien estre trahi. Les portes, au lés où les Englois et Bretons asalloient, furent ouvertes, et entrèrent dedens tout abandonneement. Ensi fu Vennes prise de par mesire Robert d’Artois et mesire Gautier de Mauni; mais trop furent les Englois courouchié que li quatre baron qui dedens estoient, lor estoient ensi escapet, et li aultre chevalier de Bretagne et de France, car bien i avoit de prisonniers pour cent mille florins. Fos 89 vº et 90.