Tant cevauchièrent li rois d’Engleterre et ses gens, depuis que il se furent departi de la bonne ville de Kem, que il aprochièrent Louviers, une bonne ville, et où on faisoit grant fuisson de draperie, et estoit pour lors rice et plentiveuse de tous biens. Les Englois entrèrent dedens à peu de fait, car pour lors et en devant elle n’estoit noient fremée. Si fu la ville courue et reubée, mais il ne prendoient que toutes bonnes coses, et ne se voloient mais cargier de si grant meuble que il avoient fait en devant, pour tant que lor navie ne les sievoit plus. Nequedent ne se pooient il tenir de pillier et de rompre huges et escrins et de prendre or et argent, qant il le trouvoient. Et qant il avoient assamblé des draps, des lainnes et des biaus jeuiauls à grant fuisson, il apactissoient les honmes dou pais qui se boutoient ens ès fors. Et tenoient trop bien lors pactis, et lor vendoient tout ce de gros que pris et pilliet avoient; et donnoient pour cent florins ce qui en valloit mille, et ensi orent il moult de finance sus le cemin.
Qant il orent fait lors bons et lors volentés de Louviers et il s’en departirent, li darrainnier boutèrent le feu dedens; et puis entrèrent en la conté d’Evrues et l’ardirent toute, reservé les forterèces. Et passèrent Pasci et au Pont à l’Arce et aprocièrent la chité de Roem, qui pour lors estoit moult bien garnie de gens d’armes et de signeurs; mais chil qui dedens estoient, n’avoient nulle volenté de issir, car il avoient bien oï dire que la ville de Kem estoit perdue par l’orguel des bourgois de la ville, qui vorrent issir. Et là estoient en garnison li contes de Harcourt, frères à mesire Godefroi, et li contes de Dreus, mais sa ville fu arse. Li avant garde ne se peurent tenir, c’est à entendre chil qui la gouvernoient, que il n’aproçassent Roem, et en ardirent les fourbours. Li rois d’Engleterre et sa bataille passèrent ensi que à une lieue priès, et se rengièrent et ordonnèrent à la veue et moustre de ceuls qui en Roem estoient, et lor mandèrent la bataille par un hiraut; mais point ne s’i acordèrent.
Si tournèrent les Englois deviers Vrenon, où il i a bon chastiel et fort, auquel il ne fissent nul samblant de l’asallir, mais il ardirent la ville, et puis Vrenuel et tout le pais de environ Roem et le Pont de l’Arce. Et vinrent ensi tout ardant le pais, à destre et à senestre, et devant euls jusques à Mantes et Meulent. Et passèrent assès priés dou fort chastiel de Roleboise, mais point n’i assallirent. Et partout sus la rivière de Sainne trouvoient il les pons deffais. Et tant ceminèrent que il vinrent à Poissi, et trouvèrent le pont deffait; mais encores estoient les estaces dou pont et les gistes en la rivière. Si se aresta là li rois et toute li hoos, et i sejournèrent cinq jours. Et entrues entendirent les Englois carpentiers, que il avoient amené en lor compagnie, au pont refaire. Et couroient li fourageur tout le pais environ, tant que, des feus que il faisoient ou plat pais, les fumières en estoient veues de Paris.
Li rois Phelippes et li signeur de France, qui se amassoient à Paris et venoient de tous costés, avoient grant mervelle de ce que les Englois faisoient. Et disoient ensamble li auqun: «Mervelles est dou voiage des Englois. Que pensent il à devenir, ne où quident il passer la rivière de Sainne?» Disoient à aultre qui respondoient à ce pourpos: «Il iront passer en Bourgongne, qui ne lor ira aultrement au devant.»—«Que on conmence donc! respondoient li aultre; il n’est point en lor poissance de faire ce voiage: il seront avant conbatu quatre fois.» Or fu on moult esmervilliet à Paris, qant les nouvelles i vinrent que les Englois avoient refait le pont à Poisi, et estoient tout passé la rivière de Sainne. Donc fu conmune renonmée que les Englois venroient devant Paris. Donc se departi li rois Phelippes à toute sa cevalerie que il avoit très grande, et s’en vint à Saint Denis. De quoi li bourgois de Paris furent tout esbahi, mais il leur fist dire et semer paroles que il se departoit pour aler au devant des Englois et euls combatre; et parmi tant, li peuples de Paris s’apaissa. Et li rois d’Engleterre se tint à Poissi cinq jours, et fu là le jour de la Nostre Dame mi aoust, et tint court solempnèle en l’abeie des Dames de Poisi, et sist à table en draps vermauls d’escarlate, fourés d’ermine, et en sourcot sans mances, et tint son estat roial de toutes coses, aussi bien ou mieuls que il fust en Engleterre.
Qant li rois d’Engleterre ot esté à Poisi les Dames, cinq jours, et ils et ses gens s’i furent rafresqi, il s’en departirent et cevauchièrent oultre en aproçant Paris. Messires Godefrois de Harcourt, li contes de Warvich, messires Renauls de Gobehem et messires Thomas de Hollandes menoient l’avantgarde, et cevauçoient à tout cinq cens lances et douze cens archiers, et ardoient et essilloient tout le pais devant euls. Et avoient ars les Englois, estans euls à Poisi les Dames, Saint Germain en Laie, la Montjoie, Saint Clo et Boulongne, et courut jusques ens ès fourbours de Paris. Et pour ce avoient esté li Parisien si esbahi, car adonc Paris n’estoit noient fremée fors de kainnes, et furent adonc toutes levées et sierées, qant li rois fu partis et venus à Saint Denis. Fos 114 et 115.
P. [147], l. 28: soissante.—Mss. A 1 à 6, 11 à 14, 18 à 22: quarante. Fº 138 vº.
P. [148], l. 7 et 8: l’un à l’un des lés et l’autre à l’autre lés.—Mss. A 1 à 6, 8, 11 à 22: l’un d’un costé et l’autre d’autre. Fº 139.—Mss. A 23 à 33: l’ung à dextre et l’aultre à senestre. Fº 159.
P. [148], l. 10 et 27: voir [Sup. var.] (n. d. t.)
P. [148], l. 12: Louviers.—Mss. A 23 à 33: Loviers.—Mss. A 20 à 22: Louvres. Fº 201 vº.
P. [148], l. 30: de Dreus.—Mss. A 1, 3: d’Evreux.