Adonc que chil doy messaige furent venu en Franche, se estoient nouvellement acordé li dus de Normendie et li roys de Navare, et revenu de Melun à Paris, enssi que vous avés oy. Si fissent mander tous lez haux barons, tous les noblez et les conssaux des bonnes villes, à un certain jour à estre à Paris, à le requeste dez deux messaiges dessus dit. Quant tout furent assamblé, li doy messaige fissent ce pour quoy il estoient venu, et les lettrez lire devant tous et remoustrer les poins et les articles qui y estoient contenu et acordé des deux roys de leur bonne vollenté. Quant tout li point furent leut et entendut, et bien consideret et ymaginet, tout se trayrent à consseil d’une part et se consillièrent longement et ne peurent y estre ad ce consseil d’acord; car la dite pès sambloit à aucuns estre trop durement griefs pour le royaumme de France en pluisseurs mannierres. Se ne s’i vorrent acorder, ains avoient plus chier à endurer le grant mescief où il estoient et le meschief dou roy Jehan, leur seigneur, et atendre le plaisir de Dieu, que consentir que si nobles royaummes de Franche fust enssi deffraudés ne amenris que li pès contenoit. Quant li doy message deseure dit entendirent ces raisons, il prissent congiet à tous et s’en rallèrent en Engleterre, et comptèrent as deux roys chou qu’il avoient fait et comment on leur avoit respondut. Fo 116 vo.
P. [181], l. 3: dist.—Ms. B 6 ajoute: tantost que le roy de Navare avoit tout che braset. Fo 593.
§ [448]. P. [181], l. 7: Ces deux signeurs.—Ms. d’Amiens: Quant li roys englès eult entendu ces nouvelles, il en fu durement courouchiés. Si dist, oant tous chiaux qui le pooient oïr, que, ainchois que li yviers fust entrés, il enteroit si puissamment ou royaumme de Franche et y demourroit tant qu’il aroit fin de guerre ou bonne pès à son plaisir et à sen honneur. Si fist coummencier à faire le plus grant appareil que on ewist oncques veu faire en celui pays pour guerrier.
Ces nouvellez yssirent hors par tous pays si ques partout chevalier, escuier et gens d’armes se coummenchièrent à pourveir grossement et chierement de chevaux et de harnas, chacuns dou mieux qu’il peult, seloncq son estat. Et se traist chacuns, si tost qu’il peut, par deviers Callais pour atendre la venue dou roy englès; car chacuns penssoit à avoir si grans biensfais de lui et tant d’avoir gaegnier en France que ne seroit povres.
Environ le moiienné d’aoust, en ceste meysme saison, avint que li arcevesques de Rains, messire Jehan de Craan et chil de le ditte chité et dou pays d’environ, à l’ayde de chiaux de le comté de Reteis et des seigneurs et des chevaliers de celui pays, s’asamblèrent et vinrent mettre le siège par devant le ville et le castiel de Roussi. Et le constraindirent si, sur le tierme de trois sepmainnes qu’il y sissent, que cil qui dedens estoient se rendirent, sauve leurs vies et lors membres. Et pooient aller leur voie sauvement, chacuns à tout un cheval; mès li plus grant partie furent tué par les gens des coumunes, oultre l’acord que li seigneur et les gens d’armes avoient acordé.
Et si y fu pris à grant meschief chils qui se faisoit clammer Hannekins Franchois, qui estoit cappittainne de tous les autres et qui tenoit le dit comte de Roussi layens en prison, liquelx y fu rescous et delivrés: se li vint bien à point. Chils Hannekins Franchois fu en trop grant peril d’estre tués, quoyque li seigneur li ewissent acordé; car il estoit si hays et si renoummés des mauvais et vilains fès qu’il avoit fais, que li coummun le volloient tuer entre les mains des gentils hommes. Touttesfois il fu amennés à Rains, et puisedi delivrés de l’arcevesque et des chevaliers, pour leur sierement acquitter. Fos 116 vo et 117.
P. [181], l. 17: honneur.—Ms. B 6: ou il et sy enfans y demorroient en le paine. Fo 593.
P. [181], l. 19: guerre.—Ms. B 6: et envoia ses hirauz en Allemaigne pour avoir gens d’armes, en leur senefiant que il se traissent vers Calais, sur l’esté qui revenoit, que on conteroit l’an trois cens et cinquante neuf, et que tous prest il seroient là paiiet de leurs gaiges. Ces nouvelles furent plaisant as barons d’Alemaigne. Sy se partirent pluiseurs d’Allemaigne, de le duché de Guerdre et de le duché de Julers et de le duché de Brabant et s’en vinrent à Calais où il sejournèrent là à grant frès, en atendant le passaige du roy de Engleterre.
P. [181], l. 30 et 31: le moiienné d’aoust.—Ms. A 7: la mi aoust. Fo 213.
P. [181], l. 31: Craan.—Ms. A 7: Craon.