§ [509]. Tant esploita.—Ms. d’Amiens: Quant li roys de Franche fu venus à Bouloingne, il y sejourna tant qu’il eult vent à vollenté, et entra en son vaissiel le jour devant le nuit de l’Apparition des Trois Roys. Si y fu ce jour toutte jour jusques au soir, car il y faisoit mout quoit et mout cler, et avoit vingt vaissiaux parmy ses pourveanches. Si ariva à Douvrez, et y fu deus jours, tant c’on eut descargiet tous ses vaissiaux et que li cheval furent rafresci, puis s’en parti et vint à Cantorbie. Là fu il ossi deus jours, et dounna à monseigneur saint Thumas un mout riche jeuiel et de grant pris. Et là vint ses filz li dus de Berri contre lui, et li dus d’Orliiens ses frères. Et ossi y envoiea li roys englès, pour lui festiier et requeillier à l’entrée de son pays, quatre de ses chevaliers: monseigneur Bietremieu de Bruech, monseigneur Gautier de Mauny, monseigneur Richart de Pennebruge, monseigneur Alain de Boukesel.
Chil vinrent deviers le roy de Franche à Cantorbie de par le roy d’Engleterre, et le conjoïrent et bienvegnièrent grandement, et li dissent que li roys, leurs sires, estoit moult liés de sa venue. De tout chou le crut li roys de Franche moult bien. Si les fist disner dallés lui, et apriès disner il montèrent et s’en retournèrent deviers le roy englès qui se tenoit à Eltem, et madamme le roynne, à sept lieuwes de Londres, pour là atendre le roy de Franche, liquelx se partit de Cantorbie et vint à petittes journées celle part. Et quant il fu venus à Eltem, en l’ostel dou roy englès, il y fu rechups à grant joie, che puet on mout bien croire, et tout chil qui avoecq lui estoient, pour l’amour de lui. Là eult grans festes, grans sollas, grans esbatemens, belles dansses et belles carolles de signeurs, de dammes et de dammoiselles, et s’efforchoit chacuns de festiier et de jeuer pour le cause dou roy de Franche.
Quant il eut là estet, je croy deux jours, il s’en parti et vint à Londrez, où il fu requeilliés mout honnourablement et menés et aconvoiiés de ses cousins les enfans dou roy englès, jusques à l’ostel de Savoie qui estoit ordonnés pour lui, qui siet sus le Tamise au dehors Londres: là le laissièrent il. Et là se tint li roys Jehans et tout son hostel. Si avoit dallés lui chiaux de son sanch, le ducq de Berri, son fil, le ducq d’Orliiens, son frère, le comte d’Allenchon, Robert d’Alençon et Ghui de Blois, ses cousins, qui adonc estoient jone damoisel, ossi le ducq de Bourbon et le comte de Saint Pol et les seigneurs qu’il avoit là amenés de Franche. Si tenoit là li dis roys, et tint là l’ivier grant estat et grant hostel, et estoit souvent visetés dou roy englès et de ses enffans.
Si donnoient chil roy grans disner et grans convys li un à l’autre, et jewoient et esbatoient enssamble et parloient et conssilloient de leurs besoingnez. Et regretoit souvent li roys englès monsigneur Jaquemon de Bourbon, son cousin, car moult l’avoit amet. Et disoit au roy de Franche que c’estoit grans dammaiges de lui; car bien affreoit à estre entre telx seigneurs qu’il estoient, et mieux s’i avoit sceu avoir que nulx autres. Li roys de Franche li acordoit et disoit que c’estoit verités, et que moult li avoit despleut la mort et l’aventure de lui. Enssi passoient li roy le temps, et veoient souvent l’un l’autre, et donnoient et envoioient li uns à l’autre grans dons, biaux jewiaux et riches presens, pour nourir entr’iaux plus grant amour. Fº 129 vº.
P. [94], l. 22: l’abbeye.—Les mss. A 8, 15 ajoutent: en la ditte ville. Fº 240 vº.
P. [94], l. 27: Tristrans.—Mss. A 8, 15: Tristan.
P. [94], l. 28: Pierres.—Les mss. A 11 à 14 ajoutent: et messire Jehan.
P. [94], l. 29: de Ainville.—Mss. A: Dainville.
P. [94], l. 31: maronnier.—Mss. A: mariniers.
P. [95], l. 2: ens ès.—Mss. A 8, 15: dedens les.